Vilja stofna starfshóp í baráttu við sykursýki

Velferðarnefnd hefur lagt fram þingsályktunartillögu þar sem lagt er til að heilbrigðisráðherra skipi starfshóp sem fái það verkefni að móta viðbrögð við vaxandi nýgengi sykursýki.

„Hópurinn skuli sérstaklega meta þörfina á skipulagðri skráningu sykursýki á Íslandi og reglulegri skimun fyrir sykursýki hjá áhættuhópum. Við matið verði miðað við að heilsugæslan veiti ráðgjöf samhliða skimuninni og fylgi henni eftir þegar við á,“ segir í tillögunni.

Þar segir einnig að níu af hverjum tíu einstaklingum með forstig sykursýki viti ekki af því, þar sem einkenni séu sjúklingum oft ekki ljós. „Því eru líkur til þess að með reglulegri skimun fyrir sykursýki hjá áhættuhópum mætti í mörgum tilvikum greina sjúkdóminn og forstig hans mun fyrr en ella.“