Aron um hvað Lars sagði við hann í Albaníu: „Hann bað mig vinsamlegast að læra af þessu“

„Ég var að leggja mig og þá heyrði ég bank. Ómar Smárason, fjölmiðlafulltrúi, kemur inn í herbergið og segir mér að við þurfum að búa til afsökunarbeiðni. Fyrir hvað, spurði ég. Þá fer ég að skoða þetta og sé að ég er með 30 ósvöruð símtöl.“

Þetta segir Aron Einar Gunnarsson, landsliðsfyrirliði í fótbolta, þegar hann rifjar upp atvikið fræga fyrir leik Albaníu og Íslands í undankeppni HM 2014 en daginn fyrir leikinn í Tírana talaði fyrirliðinn af sér í viðtali við Fótbolti.net.

Aron Einar talar um atvikið í Albaníu í myndinni Jökullinn logar sem er komin út á DVD. Myndband af því má sjá í spilaranum hér að ofan.

Sjá einnig:Ragnar: „Ég fékk boltann og hugsaði að nú ætla ég að gera eitthvað sniðugt“

„Þessi þjóð er ekkert upp á marga fiska. Hér er mikil fátækt og þetta eru mestmegnis glæpamenn,“ sagði fyrirliðinn daginn fyrir leikinn gegn Albaníu en þetta komst í fjölmiðla þar ytra og varð allt vitlaust.

Ber að ofan með haglabyssu

Aron Einar sagði frá því í þáttaröðinni Atvinnumennirnir okkar á síðasta ári að minnstu munaði að fyrirliðabandið hefði verið tekið af honum, svo alvarlegt var málið.

„Ég nennti ekki að vera gaurinn sem talaði alltaf í klisjum og sagði sömu hlutina. Fólk nennti að hlusta á mig af því að ég var öðruvísi og sagði það sem ég vildi segja. En þarna gekk ég of langt,“ viðurkennir fyrirliðinn.

„Ég var beðinn um að lýsa því hvernig það var að vera kominn til Albaníu. Þegar við lendum sé ég gaur beran að ofan með haglabyssu á bakinu og maður var búinn að heyra sögur sem svo voru kannski ekkert sannar.“

„Ég fattaði ekki að ég gerði eða sagði neitt rangt fyrr en þetta var komið inn á DV.is. Ég áttaði mig á því að þetta var rangt. Ég meina, þetta er það heimskulegasta sem þú getur sagt,“ segir Aron Einar.

Heimir Hallgrímsson, landsliðsþjálfari, ræðir atvikið í myndinni en í hans huga kom aldrei neitt annað til greina en að Akureyringurinn myndi leiða íslenska liðið út á völlinn. Það voru ekki þjálfararnir, Heimir og Lars, sem vildu taka af honum bandið.

Þurfti að læra af þessu

„Við ákváðum það að Aron yrði fyrirliði í þessum leik sama hvað. Í staðinn fyrir að brotna kom hann margfalt sterkari inn í leikinn og átti frábæran leik. Hann spilaði vel en ekki síður var hann góður leiðtogi þar sem hann leiddi liðið inn í þetta stríð,“ segir Heimir.

Sjá einnig:Aron Einar: „Hringdi oft hágrenjandi í mömmu en fékk alltaf sama svarið“

Aron Einar spilaði virkilega vel í leiknum og eftir sigurinn sem Gylfi Þór Sigurðsson tryggði með fallegu aukaspyrnumarki sagði Lars Lagerbäck, þáverandi landsliðsþjálfari, nokkur vel valin orð við Aron Einar.

„Ég man alltaf að Lars kom upp að mér eftir leikinn og sagði mér að ég hafði aldrei spilað jafnvel fyrir landsliðið því ég var svo einbeittur á að bæta upp fyrir mistökin. Hann bað mig vinsamlegast um að læra af þessu,“ segir Aron.

„Ég þurfti bara að læra af þessu og þroskast. Ég hef gert það og er bara klisjumaður í viðtölum í dag,“ segir Aron Einar Gunnarsson.

Brot úr aukaefni myndarinnar Jökullinn logar má sjá hér að ofan. Jökullinn Logar er mynd Sölva Tryggvasonar um ferðalag strákanna okkar á EM í Frakklandi en hún er nú komin út á DVD með 120 mínútum af aukaefni.