Samrýndar systur í Sundur á nýrri plötu

 „Ég bjó eitt ár í Amsterdam og Jófríður var á Íslandi – þá kom Jófríður í heimsókn eða ég fór til Íslands. Síðan flutti ég aftur til Íslands og Jófríður fór á flakk þannig að við þurftum að skipuleggja okkur mun betur en áður - hvenær við þurftum að æfa og taka upp,“ segir Ásthildur Ákadóttir, annar helmingur hljómsveitarinnar um hvernig gekk að taka upp plötuna nýju. Titill hennar er einmitt Sundur og vísar þá að einhverju leyti til þessara aðstæðna hjá þeim systrum og þess ferlis sem er bak við plötuna.

Ásthildur segir að það að hafa haft meiri tíma til að vinna í tónlistinni í sitthvoru horninu hafi skilað sér út í músíkina í formi annars konar pælinga en áður hafi kannski verið í gangi á fyrri verkum sveitarinnar. Síðasta plata Pascal Pinon var titluð Twosomeness og því kallast þessir titlar skemmtilega á og eru lýsandi fyrir verkferlana að einhverju leyti, samheldnin fyrst og hvernig þær síðan eru sundur við framleiðslu þessarar nýjustu afurðar.

Í einu laginu á plötunni er spilað á flugvélaparta. Það var raunar Áki Ásgeirsson, faðir þeirra Jófríðar og Ásthildar, sem sá um að koma með og spila á þessa parta, en hann hjálpaði einnig til við að taka plötuna upp.

„Hann kom í rauninni bara með risastórt box af flugvélapörtum. Við hengdum þá upp og við spiluðum á þá. Ég er ekki alveg viss hvers vegna við gerðum það – en það hljómaði mjög vel og það er kannski bara aðalástæðan,“ segir Ásthildur og aðspurð hvaðan þessir flugvélapartar hafi komið var hún alls ekki viss og raunar sjálf jafn forvitin um það og blaðamaður var.

Ásthildur vill alls ekki tala um að þetta sé á einhvern hátt fjölskylduplata þó að þær Ásthildur og Jófríður séu tvíburasystur og að faðir þeirra hafi komið að upptökum plötunnar að ýmsu leyti. Sumum finnst mögulega óþægilegt að vinna með fjölskyldumeðlimum en Ásthildur er ekki á þeim buxunum.

„Það er nefnilega merkilega fínt. Við erum búnar að vera í hljómsveit saman svo lengi. Það er svo mikið auðveldara ef ég sem lag eða Jófríður semur lag þá getur maður sagt „hey þetta er alveg ömurlegt dót“ án þess að nokkur móðgist. Það er rosalega hollt.“

Platan Sundur kom út á föstudaginn var og það er hægt að nálgast hana meðal annars á Bandcamp-síðu sveitarinnar og auðvitað út í búð á föstu formi.