Reykur var um borð í vél EgyptAir

Upptökur úr flugrita farþegavélar EgyptAir staðfesta að reykur var um borð í þotunni áður en hún hrapaði til jarðar. Upptökurnar sýna að tveir reykskynjarar, inni á salerni vélarinnar og í vélarrými fyrir neðan flugstjórnarklefann, fóru í gang skömmu áður en þotan hvarf af ratsjám.

Fram kemur á vef BBC að sjálfvirkt viðvörunarkerfi hafi gefið sömu upplýsingar. Þá segja rannsakendur að skemmdir á framhluta vélarinnar bendi til þess að kviknað hafi í henni. Orsakirnar eru enn ókunnar en ekki hefur tekist að sækja upplýsingar úr hinum flugrita vélarinnar.

Farþegaþotan fórst hinn 19. maí síðastliðinn. Alls voru 66 manns um borð.