Zlatan búinn að semja um kaup og kjör

Zlatan Ibrahimovic hefur náð samkomulagi um kaup og kjör við Manchester United ef marka má frétt the Guardian.

Félagaskiptin velta nú á viðræðum sænska framherjans og José Mourinho, nýráðins knattspyrnustjóra United, um hlutverk hans í liðinu. Hinn 34 ára gamli Zlatan hefur víst lítinn áhuga á að vera varamaður á Old Trafford á næsta tímabili.

Zlatan mun væntanlega fá í kringum 220.000 pund í vikulaun en það á eftir að semja um þóknunia sem umboðsmaður Svíans, Mino Raiola, fær fyrir sinn þátt í félagaskiptunum.

Samkvæmt fréttinni hafði Tottenham Hotspur einnig áhuga á að fá Zlatan en United ku vera eina félagið á Englandi sem hann hefur áhuga á að semja við.

Zlatan spilaði undir stjórn Mourinho hjá Inter tímabilið 2008-09 og þeir hafa verið í góðu sambandi allar götur síðan.

Zlatan er nú með sænska landsliðinu sem undirbýr sig fyrir EM í Frakklandi. Svíar mæta Írum í fyrsta leik sínum á EM 13. júní næstkomandi.