Smíðaði bíl frá grunni

Þó bílaauglýsingar teljist síst fátíðar á síðum blaðanna er þaðöllu sjaldgæfara að heimasmíðaðir fornbílar komi á sölu. Það gerðist þóá dögunum og er sá bíll ekki síður merkilegur fyrir þær sakir að hann er nákvæm eftirmynd fyrsta bílsins sem kom hingað til lands. Það er Sverrir Andrésson sem á heiðurinn af smíði bílsins.

„Það eru mörg ár síðan mér datt fyrst í hug að það væri gaman að smíða bíl sem væri eftirmynd Thomsens-bílsins, sem var fyrsti bílinn sem kom hingað til lands,“ segir Sverrir.

Það var árið 1904 sem Dethlev Thomsen, konsúll og kaupmaður, flutti inn þýskan bíl af gerðinni Cudel. Gatnakerfi Reykjavíkur og nágrennis var ekki upp á marga fiska og hinn þánefndi mótorvagn reyndist ekki sem skyldi hér á landi og var seldur úr landi árið 1908.

„Þannig að það er ekki til eitt einasta stykki úr honum hér á landi. Svo ef maður ætlar að gera bíl eins og hann þarf að búa það allt til einhvernvegin," segir Sverrir. 

Eftir tíðar bréfaskriftir til Þýskalands í leit að samskonar bíl eða varahlutum án árangurs ákvað Sverrir að smíða Thomsensbílinn frá grunni og hafði ljósmyndir til hliðsjónar. 

„Ég finn allt til íþetta sem þarf að nota. Fann til dæmis gamlan Susuki-bíl sem ég gat notað vélina úr. Og svo var bara tekið við að smíða. Og með hjálp margra góðra manna er bíllinn eins og hann er í dag," segir Sverrir. 

Eins og sjá má á meðfylgjandi myndskeiði er bíllinn mikil völundarsmíð og vandað til verka við hvert einasta smáatriði. Það sjaldgæfa vandamál kom til dæmis upp að ekki var nógu hátt hljóð í vélinni. Sverrir fékk þá vin sinn til aðútbúa hljóðbút sem líkastan þeim látum sem fyrirmyndin framkallaði. 

Bíllinn er ekki sá eini sem Sverrir hefur á ferilskránni en hann á nákvæma skrá yfir þá 96 bíla sem hann hefur átt í gegnum tíðina. 

Sverrir segist hættur í bílastússinu. Hann geri það með öðrum hætti í dag þar sem hann safni myndum af gömlum bílum, ekki síst bílum úr Árneshreppi.