Styrking krónunnar mesta ógnin við ferðaþjónustuna

Áætlað er að íslensk ferðaþjónusta muni skila á fimmta hundrað milljarða króna í gjaldeyri inn í hagkerfið í ár, enda von á um 1,8 milljónum ferðamanna til landsins.

Þótt þróunin hljóti að teljast jákvæð fyrir þjóðarbúið varaði Grímur Sæmundsen formaður Samtaka ferðaþjónustunnar við því, á Ferðaþjónustudeginum svo nefnda í dag, að þessum mikla vexti fylgi ný ógn við sjóndeildarhringinn.

Gjörbreytir forsendum fyrir afnámi gjaldeyrishafta

„Helsta ógn hvað varðar samkeppnishæfni ferðaþjónustu til skamms tíma er styrking gengis íslensku krónunnar. Og þar erum við kannski fórnarlömb eigin velgengni, vegna þess að uppgangur ferðaþjónustunnar hefur skapað gríðarlegt gjaldeyrisinnflæði og þetta gjörbreytir forsendum hvað varðar afnám gjaldeyrishaftanna.“

Grímur segir alveg ljóst að gengi gjaldmiðla sé mjög sterkur þáttur í vali ferðamanna á áfangastöðum, sem megi til dæmis sjá því að vöxtur greinarinnar nú byggir að miklu leyti á fjölgun ferðamanna frá Bandaríkjunum og Bretlandi, þar sem gengið er sterkt. „Á meðan er ekki sami vöxtur á gömlu mörkuðunum okkar eins og Mið-Evrópu og Skandinavíu, sem við teljum vera í beinu sambandi við veikingu evrunnar að undanförnu."

Stjórnvalda að gæta þess að krónan styrkist ekki um of

Því séu miklir hagsmunir undir því komnir að krónan styrkist ekki frekar. „Það er á verksviði stjórnvalda og í þeirra höndum að hafa auga á þessu. Það má vinna gegn styrkingu krónunnar eftir afnám gjaldeyrishafta með mótvægisaðgerðum.“

Ragnheiður Elín Árnadóttir ráðherra ferðamála. Segir að enginn vilji sjá ferðamannaævintýrið enda eins og síldarævintýrið. Stjórnvöld séu meðvituð um að tryggja verði stöðugleika í efnahagslífinu, þar sem ferðaþjónustan vegur þungt.

„Í vegvísi um ferðaþjónustuna sjálfa erum við sérstaklega með eitt verkefni sem er hafið í [Stjórnstöð ferðamála] sem er áhættugreining og setning ákveðinna sviðsmynda. Ef að það kemur eldgos ef að gengið verður of sterkt, ef að einhver óáran skellur á okkur. Hvernig við eigum að bregðast við. Þetta er auðvitað stóra samhengið í ferðaþjónustunni og í öllu efnahagslífinu.“