Vopnaður maður braust inn í hús á Hellu og hafði í hótunum við fólk

Karlmaður vopnaður hnífi braut sér leið inn í hús á Hellu skömmu eftir hádegi á föstudag og hafði í hótunum við fólk. Þetta kemur fram í tilkynningu frá lögreglunni á Suðurlandi en þar segir að maðurinn hvarf á braut á líkamsmeiðinga.

Leitað var aðstoðar sérsveitar ríkislögreglustjóra til að leita að manninum sem fannst í húsi í þorpinu. Sérsveitarmenn handtóku manninn sem veitti ekki viðnám við handtökuna. Hann var fluttur í fangageymslu á Selfossi. Við húsleit á heimili mannsins fundust 14 lítrar af landa. Maðurinn var kærður fyrir húsbrot, eignaspjöll, hótanir og áfengislagabrot. Hann var látinn laus að yfirheyrslu lokinni.

Þá kom upp eldur kom í geymslu í íbúðarhúsi að Tjaldhólum á Selfossi uppúr klukkan þrjú á laugardag. Slökkvilið Brunavarna Árnessýslu réði niðurlögum eldsins sem hafði ekki náð sér á strik vegna þess að rýmið var lokað og súrefni komst ekki að nema í takmörkuðu magni. Talsvert tjón varð vegna sóts en minna vegna eldsins.

Grunur er um að eldurinn hafi kviknað út frá rafmagnstengi. Lögreglan segir einnig frá vinnuslysi við Búrfellsvirkjun á miðvikudag. Þar missti starfsmaður verktaka framan af fingri þegar hann varð á milli keðja sem voru notaðar til að hífa upp lóð. Maðurinn var fluttur á slysadeild Landspítala þar sem gert var að sárum hans.

Í síðustu viku voru 18 ökumenn kærðir fyrir hraðakstur í umdæmi lögreglunnar á Suðurlandi. Flestir á þjóðvegi 1 í Rangár- og V- og A- Skaftafellssýslum. Sá sem hraðast fór var á 137 km hraða í Eldhrauni á ísuðum vegi. Sama dag á sömu slóðum voru nokkrir til viðbótar kærðir fyrir að fara of hratt. Lögreglan segir þetta vera talsvert áhyggjuefni því þarna séu í mörgum tilvikum ökumenn sem ekki hafa reynslu af akstri í snjó og hálku. Lögreglan segist til að mynda hafa stöðva för eins ökumanns sem reyndist ölvaður á 117 kílómetra hraða austan við Hvolsvöll um kvöldmatarleytið á miðvikudag.