Bann Platini og Blatter stytt

Sepp Blatter og Michel Platini töpuðu í dag máli sínu fyrir áfrýjunardómstóli Alþjóðaknattspyrnusambandsins, FIFA. Átta ára bann þeirra var þó stytt í sex ár.

Báðir voru dæmdir sekir í máli sem varðar 1,3 milljóna evra greiðslu FIFA til Platini en báðir neita þeir sök, sem fyrr.

Sjá einnig: Sepp Blatter og Michel Platini dæmdir í átta ára bann

Þeir segja að greiðslan hafi verið fyrir ráðgjafastörf sem Platini vann fyrir Blatter en engin gögn eru sem styðja mál þeirra og því engin haldbær gögn til sem skýra þessa greiðslu.

Blatter hefur þegar birt yfirlýsingu þar sem hann lýsir yfir vonbrigðum með niðurstöðu dómstólsins og segir Blatter að hann muni fara með málið fyrir Alþjóðlega íþróttadómstólin í Lausanne [CAS].

Kosning á nýjum forseta FIFA fer fram á föstudag.