Sextán ára strákur skorar í hverjum leik með Liverpool en Klopp mun passa upp á hann

Enska úrvalsdeildarliðið Liverpool er búið að vinna þrjá fyrstu æfingaleiki sína fyrir komandi tímabil en nú síðast vann liðið Wigan. Ný hetja hefur fæðst í síðustu leikjum.

Liverpool vann 2-0 sigur á Wigan í gær en hafði áður unnið 5-0 sigur á Fleetwood Town og 1-0 sigur á Tranmere Rovers á dögunum.

Mörk Liverpool í sigrinum á Wigan skoruðu þeir Danny Ings og inn sextán ára gamli Ben Woodburn. Danny Ings er kominn til baka eftir erfið hnémeiðsli en hann skoraði í sigrinum á Wigan og gerði einnig sigurmarkið á móti Tranmere Rovers.

Ben Woodburn hefur heldur betur slegið í gegn í þessum leikjum því hann skoraði einnig í stórsigrinum á Fleetwood Town. Woodburn skoraði seinna markið á móti Wigan en hafði skorað annað markið í sigrinum á Fleetwood Town. Knattspyrnustjórinn biðlar til enska fjölmiðla að passa sig að keyra ekki umfjöllunina upp úr öllu valdi.

„Ég er sérstaklega hrifinn af svona sögum. Vandamálið er að þið getið skrifað of mikið um þessa stráka. Þið hafði alveg nógu mikinn tíma til að skrifa um þá því þeir eru enn svo ungir," sagði Jürgen Klopp, knattspyrnustjóri Liverpool um Ben Woodburn í viðtali á heimasíðu Liverpool.

„Þið megið skrifa um þá þegar þeir eru 18 eða 19 ára í stað þess að setja þá í þá stöðu að þeir fari að velja á milli þess að fara í skóla eða ekki í skóla. Við erum einskonar fjölskylda fyrir þessa stráka og þurfum að hafa auga með þeim," segir Klopp.

„Það er ekki mikilvægt hvað þeir eru að gera fyrir okkur núna því þeir eru með sitt eigið unglingalið. Þeir þurfa bara að vera agaðir, einbeittir, hlusta vel og takist þeim það þá geta þeir átt flotta framtíð. Það er mikil vinna sem bíður þeirra áður en sá tími rennur upp. Við skulum byrja á því að vinna með þeim og láta fjölmiðlana bíða," sagði Klopp.