Er hamingjusamasti Hannes í heimi

Hulda Þórisdóttir, lektor í Stjórnmálafræðideild rannsakar nú, ásamt Jóni Gunnar Bernburg, prófessor í félagsfræði, hvort verið geti að hamingja fari saman við pólitíska hugmyndafræði? Rætt er við Huldu í Tímariti Háskólans og þar kemur fram að Hulda og Jón Gunnar telja góðar líkur séu á þessu og lýsa megi sambandi hamingju og pólitískrar sýnar í svokallaðri U- eða sveiglaga kúrfu: „Þetta þýðir í raun að þeir sem sterklega aðhyllast einhverja hugmyndafræði eru að jafnaði eilítið hamingjusamari en þeir í miðjunni. Ástæðuna má rekja til þess að hugmyndafræði ljær tilvist manna merkingu og jafnvel tilgang, en hvort tveggja er sterklega tengt lífshamingju,“ segir Hulda.

Sá sem helst er þekktur fyrir það á Íslandi að hafa miklar hugmyndafræðilegar meiningar er Hannes Hólmsteinn Gissurarson prófessor. „Þetta rímar algerlega við mína reynslu,“ segir Hannes í samtali við Vísi. „Þeir sem hafa hugsjónir og finna þeim farveg eru hamingjusamari.“ Hann segist hamingjusamur, „tvímælalaust“ og lýsir þeirri skoðun sinni að hamingjan byggist á því að heilsan sé góð, þá skipti góðir fjölskylduhagir máli og í þriðja sæti yfir áhrifavalda telur Hannes vera efnahagslega velsæld.

Hannes segir þetta afar áhugaverða rannsókn og bætir því við að hann gæti best trúað því að hægri menn séu hamingjusamari en vinstri menn.

En, hvað þá með þessa U-kúrfu; ertu að meina að til dæmis Ögmundur Jónasson alþingismaður, sé ekki eins hamingjusamur og þú?

„Ég vona að hann sé hamingjusamur en mér finnst ég ekki merkja það á hans skrifum. Mér finnst vinstri menn ekki eins hamingjusamir og hægri menn. Þeir virðast alltaf í vondu skapi. Ég held að hægri menn vilji græða á daginn og grilla á kvöldin. Ég vil grúska á daginn og grilla á kvöldin. Hægri menn eru ekkert að gera sér of mikla rellu út af hlutunum.“

Og Hannes virðist, samkvæmt rannsóknum Huldu og Jóns Gunnars, hafa sitthvað til síns máls. Evrópskar og bandarískar rannsóknir hafa ítrekað sýnt að hamingja eykst eftir því sem fólk er lengra til hægri í pólitík og fræðimenn telja að það megi skýra, að minnsta kosti að hluta til, með viðhorfinu til ójafnaðar. „Hægri sinnaðir telji ójöfnuð óhjákvæmilegan og jafnvel æskilegan samfélagslegan drifkraft á meðan fólk til vinstri telji hann samfélagsmein,“ segir Hulda.

Hannes Hólmsteinn segir að til séu kannanir á hamingju sem sýna að þær þjóðir sem búa við velmegun séu hamingjusamari en hinar. „Peningar gera menn ekki hamingjusama en gera óhamingjuna bærilega. Rannsóknir sem ég þekki sýna að það er væg fylgni milli velmegunar og hamingju,“ segir Hannes og bendir á að eitt og annað sem íbúar í minna velmegandi löndum mega búa við svo sem stríðsástand, drepsóttir, barnadauði og annað þvíumlíkt, það valdi óhamingju.