Flagararnir eru feðgar: Grunaðir um sex þjófnaði og verða í einangrun í tvær vikur

Mennirnir tveir sem grunaðir eru um þjófnað úr verslunum á ferðalagi sínu um landið hafa verið úrskurðaðir í tveggja vikna gæsluvarðhald og einangrun. Um er að ræða feðga sem hafa engin tengsl við landið en þeir eru grunaðir um sex brot sem eru til rannsóknar hjá fjórum lögregluembættum á landinu.

Mennirnir voru handteknir nærri Höfn í Hornafirði þann 11. ágúst. Vísir hafði þegar fjallað um þjófnað þeirra úr búð á Blönduósi þann 8.ágúst.

Rupluðu úr Húnabúð

„Það kom til mín erlendur maður og bað mig um að aðstoða sig við að velja peysu á sig sem ég geri að sjálfsögðu. Honum gekk illa að ákveða sig og talaði lengi við mig,“ sagði Sigurlaug Gísladóttir, eigandi Húnabúðar við Vísi daginn sem feðgarnir létu til skarar skríða.

Á meðan laumaði annar maður sér inn í verslunina og hafði þaðan á brott allt sem var í kassanum og veski eigandans. Alls rændi hann um 70.000 krónum auk öllum kortum, skilríkjum og persónulegum munum Sigurlaugar sem í veskinu voru.

Í framhaldinu virðast þeir hafa haldið áfram hringveginn í norður og austur. Eru þeir grunaðir um þjófnað með svipuðum aðferðum meðal annars á Sauðárkróki og Eskifirði. Einnig er um að ræða innbrot í hús og sumarbústaði. Lögreglan missti af þeim á Eskifirði en vegatálmi var settur upp á þjóðvegi 1 við Höfn í Hornafirði og þeir stöðvaðir.

Segja ekki orð

Mennirnir neita að tjá sig um málið og vilja ekkert segja um myndir af þeim sem náðust á öryggismyndavélar. Þá neita þeir einnig að tjá sig um þýfi sem fannst á þeim.

Þar sem mennirnir hafa engin tengsl við landið er óttast að þeir haldi áfram að brjóta af sér eða þá flýi land. Telja bæði Héraðsdómur Suðurlands og Hæstiéttur að beiðni um gæsluvarðhald uppfylli nauðsynleg skilyrði. Feðgarnir verða því í einangrun til 26. ágúst.

Dóm Hæstaréttar má lesa hér en dómar feðganna eru svo til eins.