Mikið að gera á nýársnótt: Sturlaðist vegna ölvunar

Nýársnótt var venju samkvæmt erilsöm hjá lögreglu en flest atvik sem skráð voru tengdust eldsvoðum eða slysum vegna flugelda og umferðarlagabrotum. Einn gisti fangageymslu á Hverfisgötu eftir að hann var fjarlægður af heimili í austurhluta borgarinnar. Samkvæmt upplýsingum frá lögreglu sturlaðist hann vegna ölvunar.

Þriggja ára stúlka í Vesturbænum var flutt á slysadeild eftir að flugeldur úr skottertu fór í andlit hennar rétt fyrir miðnætti. Rúmlega fertugur karlmaður á skólalóð við Vallatröð fékk áverka í andlit eftir að flugeldaterta sprakk. Hann var fluttur á slysadeild. Lögregla var kölluð að leikskólanum við Hlaðbæ þar sem kveikt hafði verið í drasli við húsið, að Haukahrauni þar sem logaði eldur í blaðagámi og að íþróttamiðstöðinni við Dalhús þar sem einnig logaði í gámi. Einnig var kveikt í rusli við Ægisíðu en þar hafði verið brenna fyrr um kvöldið. Engar skemmdir urðu og tókst slökkviliði að slökkva eldinn

Einn ökumaður var stöðvaður vegna gruns um akstur undir áhrifum fíkniefna. Fíkniefni fundust í bílnum og voru þau haldlögð. Þá var kona á fimmtugsaldri stöðvuð á Hafnarfjarðarvegi vegna ölvunar. Umferðarljós við Gullinbrú voru ekin niður en sá sem keyrði á ók af vettvangi.

Á fimmta tímanum í nótt var lögregla kölluð til að Bröttugötu þar sem tilkynnt hafði verið um líkamsárás. Lögregla hefur lítið upplýst um atvikið en samkvæmt tilkynningu lá maður í götunni og þrír menn spörkuðu í hann.