Segja skilning borgarinnar vera rangan

„Það eru mikil vonbrigði að Reykjavíkurborg skuli hafa nálgast þessi mál með þessum hætti og sett nám í tónlistinni skör lægra,“ segir Illugi Gunnarsson menntamálaráðherra um ummæli Björns Blöndal, formanns borgarráðs og staðgengils borgarstjóra, í Fréttablaðinu í gær um ábyrgð ríkisins á þeirri alvarlegu stöðu sem tónlistarskólar í Reykjavík eru í, að geta ekki fjármagnað starfsemi sína.

Fréttablaðið greindi frá því á dögunum að fjórir skólar væru mjög illa staddir fjárhagslega og að óljóst væri hvort skólarnir geta haldið áfram starfsemi sinni.

Vorið 2011 var gert samkomulag milli ríkis og sveitarfélaga um nokkur hundruð milljóna króna fjárframlag ríkissjóðs til tónlistarmenntunar á framhaldsstigi. Nemendum í tónlistarskólum fjölgaði hins vegar og vantaði töluvert upp á að fjárhæðin dygði til reksturs skólanna. Ágreiningur er nú um það hverjum beri að brúa bilið, ríkinu eða borginni.

„Skilningur formanns borgarráðs um að samkomulagið hafi með einhverjum hætti losað sveitarfélögin frá ábyrgð sem kveðið er á um í lögum varðandi rekstur tónlistarskóla á mið- og framhaldsstigi er rangur,“ segir Illugi og bætir við að afstaða Reykjavíkurborgar hafi haft skelfilegar afleiðingar. Nú sé svo komið að tónlistarskólar í Reykjavík séu komnir á heljarþröm. „Það er ekki skrítið að þeir séu að stefna borginni vegna þessa.“

Í tilkynningu frá mennta- og menningarmálaráðuneytinu segir að svo virðist sem Reykjavíkurborg hafi annan skilning á ákvæðum laganna en ríkið. Það er, að samkomulagið leysi hana undan skyldum gagnvart nemendum í framhaldsnámi í tónlist. Þetta gangi þvert á skilning þáverandi og núverandi mennta- og menningar­málaráðherra.

„Þó að ríkið hafi sett umtalsvert mikla fjármuni í að styrkja tónlistarnám var aldrei hugsunin að einstök sveitarfélög gætu sagt sig frá verkefninu, enda ljóst að sveitarfélögin fara með allt fyrirsvar málaflokksins,“ segir Illugi og bætir við að önnur sveitarfélög á Íslandi hafi axlað sína ábyrgð og haldið uppi blómlegu tónlistarlífi hér á landi.

Björn sagði frá því í Fréttablaðinu í gær að síðastliðið vor hefði annað samkomulag verið gert milli ríkisins, Reykjavíkurborgar og Samtaka tónlistarskóla í Reykjavík um aukin fjárframlög til að tryggja rekstur tónlistarskólanna. Ríkið hefði ekki staðið við samkomulagið.

Í tilkynningu frá ráðuneytinu segir að Reykjavíkurborg hafi lagt fram samkomulagsdrög síðastliðið vor til þess að afstýra málsókn skólanna á hendur henni og forða tónlistarskólunum frá gjaldþroti. Ekki hafi verið gengið frá því samkomulagi og því sé rangt að halda því fram að ríkið hafi ekki virt það.