Leggja til að loka háskóla á Laugarvatni

Lagt er til í nýrri skýrslu að leggja niður íþróttafræðasetrið á Laugarvatni og flytja það til Reykjavíkur. Skýrslan var unnin að beiðni Kristínar Ingólfsdóttur, fyrrverandi rektors, sem þáttur í að móta framtíðarstefnu og fyrirkomulag um staðsetningu náms í íþrótta- og heilsufræði við menntavísindasvið skólans.

Skýrslan var skrifuð af Ástu Möller, sem var formaður nefndarinnar, Magnúsi Lyngdal Magnússyni og Sigurlaugu Ingibjörgu Lövdahl.

Þingmönnum Suðurkjördæmis var kynnt efni skýrslunnar í gær við dræmar undirtektir. Einnig var hún til umræðu á háskólaráðsfundi Háskóla Íslands í gær.

Haraldur Einarsson, þingmaður Framsóknarflokksins, segir þessar tillögur agalegar fyrir Bláskógabyggð. „Við funduðum með rektor og formanni hópsins og fengum kynningu á innihaldinu. Þetta mun hafa mikil áhrif á stærsta byggðakjarna Bláskógabyggðar. Íþróttafræðasetrið hefur verið sterk stoð í byggðarlaginu og ef þetta fer þá mun það hafa gífurlegar afleiðingar. Ég mun berjast gegn þessum tillögum á mínum vettvangi,“ segir Haraldur.

Í sama streng tekur Oddný Harðardóttir, þingkona Samfylkingar. „Mér líst ekkert á þessar tillögur og tel þær ekki skynsamlegar. Það eru mörg afleidd störf í Bláskógabyggð sem verða til fyrir það að skólinn er á þessum stað og það er augljóst að þetta mun hafa mikil áhrif,“ segir Oddný.

Unnur Brá Konráðsdóttir, þingkona Sjálfstæðisflokks, segir mikilvægt að skólinn verði áfram með starfsemi á Laugarvatni. „Við ættum frekar að efla mánið á Laugarvatni og sækja fram og nýta þannig þá fjárfestingu sem ríkið hefur lagt fjármagn í á Laugarvatni.“

Þóroddur Bjarnason, prófessor í félagsfræði við HA, segir það skipta máli að háskólastarf nái til alls landsins. „Þetta svæði á sér langa skólasögu og hefur í gegnum tíðina verið að útskrifa fólk með mikilli prýði og gott dæmi um að það þurfi ekki að þjappa öllu háskólastarfi saman í Reykjavík,“ segir Þóroddur. „Það skiptir miklu máli fyrir þessar háskólastofnanir vítt og breitt um landið að þær séu sjálfstæðar stofnanir. Við höfum séð þetta áður með flutning stofnana en nú er bara verið að flytja stofnun í hina áttina, frá landsbyggðunum til Reykjavíkur.“

Fjórar tillögur eru nefndar í skýrslunni. Sú fyrsta er að grunnnám verði flutt til Reykjavíkur, í annan stað að flytja grunnnám til höfuðborgarinnar og skipuleggja nám í samstarfi við Háskólann á Akureyri, í þriðja lagi að nám í íþróttafærðum verði lagt niður í heild sinni sem nám við menntavísindasvið HÍ og sú fjórða að halda grunnnámi áfram á Laugarvatni en með breyttu sniði.