Íslenskur sendifulltrúi á Grikklandi segir ástandið átakanlegt

Páll Biering, dósent í geðhjúkrun við Háskóla Íslands og sendifulltrúi á Grikklandi segir ástandið þar í landi átakanlegt. Hann er úti á vegum Rauða krossins á Íslandi, og verður þar næstu sex vikurnar.

Páll starfar í flóttamannabúðum norska Rauða krossins í Idomeni, smábæ við landamæri Makedóníu. Hans helstu verkefni eru að veita flóttafólki sem fer um búðirnar sálfélagslegan stuðning.

„Það sem við gerum er að við reynum að sinna fólki sem þarf upplýsingar. Fólk sem er illa áttað, hvar það er statt, hvert það er að fara og hvað mun bíða þess,“ segir hann í samtali við Vísi.

Hann segir mikið álag hafa verið á starfsfólki og sjálfboðaliðum Rauða krossins við landamæri Makedóníu á undanförnum vikum, þar sem þúsundir hafa fengið aðhlynningu og neyðargögn.

„Þetta eru ágætlega skipulagðar búðir og sérstaklega læknisþjónustan er góð. Það er rosalegur fólksfjöldi sem fer í gegn hjá okkur, misjafnlega á sig komið. Ég held að síðan í september, síðan búðirnar opnuðu, hafi farið 270 þúsund manns hér í gegn. Þetta er kannski erfiðast fyrir börn og gamalt fólk," segir hann og bætir við að ástandið sé erfitt.

„Það er líklega átakanlegast að sjá svona fjölda. Þarna er fólk á öllum stigum og kimum samfélagsins. Fólk sem á nóg af peningum og vel útbúið, fólk sem á minna og er illa útbúið og vantar flíkur, skó og annað þvíumlíkt. Næturnar eru erfiðastar fyrir fólkið því það er afar kalt. En flestir eru nokkuð ferskir og bera sig vel. Það er mjög gaman og gefandi að tala við þau og kynnast þessu fólki," segir Páll.

Páli er einnig ætlað að þjálfa sjálfboðaliða gríska Rauða krossins í að veita sálfélagslegan stuðning. Hann hefur áður unnið fyrir Alþjóðaráð Rauða krossins í Nígeríu og Djibouti. Í Djibouti fólust verkefni Páls í að veita sendifulltrúum og starfsfólki ICRC í Jemen sálrænan stuðning, að meta þörf þeirra fyrir sálfélagslegan stuðning og setja fram tillögur um eflingu hans. Páll gegndi svipuðum störfum í Nígeríu en þar beindust þau aðallega að starfsfólki og sjálfboðaliðum nígeríska Rauða krossins.