Milljarða ávinningur fyrir útgerðina af lægra olíuverði

Tonnið af skipaolíu hefur á réttu ári helmingast í verði á markaði í Rotterdam. Olíukaup eru næststærsti útgjaldaliður útgerðarinnar í landinu og ljóst að sparnaður fyrirtækjanna hleypur fljótt á milljörðum gangi spár eftir um að verð á olíu haldist lágt næstu mánuði.

Sveinn Hjörtur Hjartarson, hagfræðingur hjá Samtökum fyrirtækja í sjávarútvegi, segir breytingarnar á olíuverði koma öllum fyrirtækjum til góða – sjávarútvegsfyrirtækjum sem öðrum. Samkvæmt þeirri tölfræði sem samtökin hafa undir höndum var verð á skipaolíu á heimsmarkaði rúmlega 900 Bandaríkjadalir á tonnið á sama tíma fyrir ári. Verð á Rotterdammarkaði í gærmorgun var hins vegar 469,50 dalir á tonnið og hafði þá lækkað úr 510,50 dölum á fyrstu fjórum viðskiptadögum nýs árs.

„Meðalverðið á þessum markaði undanfarin fjögur ár hefur legið yfir 900 dollurum, svo það munar um minna,“ segir Sveinn en segir erfitt að festa fingur á hvað þessar lækkanir þýði fyrir einstök fyrirtæki sem gera sérsamninga um olíukaup. Eins haldi styrking dollarans á móti lækkunum á hrávörumörkuðum. Um sveiflur síðustu ára í olíuverði nefnir Sveinn sem dæmi að tonnið kostaði einn áttunda af meðalverðinu síðastliðin fjögur ár.

Íslensk fiskiskip notuðu árið 2013 um 150 þúsund tonn af olíu, en miðað við hæstu og lægstu verðtölur, og í einfaldaðri mynd, kostar það magn 7,5 milljörðum minna í innkaupum á Rotterdam markaði ef meðalverð héldist út árið. Gasolía, sem aðallega er nýtt af fiskiskipaflotanum, nam 29% af heildarmagni eldsneytis sem flutt var til landsins það ár.

Hagfræðideild Landsbankans gerði olíuverðslækkanir að umtalsefni í nýjustu Hagsjá bankans sem var birt 22. desember síðastliðinn. Þar segir að innflutningur á eldsneyti og smurolíu til landsins hafi numið 90 milljörðum króna á fyrstu tíu mánuðum ársins 2014. Meðalverð á tunnu á því tímabili var tæpir 105 dollarar. Verðið fór niður í 50 dollara í viðskiptum í gær.

„Sé gert ráð fyrir að olíuverð verði áfram um 60 Bandaríkjadalir á næsta ári og gengi krónu verði stöðugt má ætla að sama magn af innflutningi muni einungis kosta um 52 milljarða króna. Við það myndu sparast um 38 milljarðar króna í erlendum gjaldeyri miðað við fyrstu tíu mánuði þessa árs,“ skrifa Landsbankamenn sem setja stærðirnar í samhengi hvað varðar íslenskt efnahagslíf.