Ekkert gefið eftir í stílbrögðum og lagavali

„Listræn vinna í undirbúningi þessa alls er í fullum gangi og verið að skipa í hlutverk,“ segir Jakob Frímann Magnússon um tónleika Stuðmanna í Eldborgarsal Hörpunnar undir yfirskriftinni Sumar á Sýrlandi.

„Þó Sumar á Sýrlandi sé þungamiðjan í þessu þá verður fjölþreifni í stílbrögðum og lagavali og ekkert gefið eftir. Það á að spegla ákveðið skeið í menningarsögu Íslands sem platan fangaði með sínum þrettán lögum og við bætum öðru eins við bæði úr eigin brunni og annarra,“ segir Jakob.

Sumar á Sýrlandi, fyrsta breiðskífa Stuðmanna, kom út árið 1975 og á henni eru klassísk lög á borð við Strax í dag og Í bláum skugga.

Litrík og skemmtileg mynd sem prýðir auglýsingu fyrir tónleikana vekur athygli en hún kemur úr smiðju Guðmundar Þórs Kárasonar í samstarfi við auglýsingastofuna Brandenburg.

Myndina segir Jakob margþætta og á mörkum hins raunverulega og óraunverulega, líkt og yrkisefnið bjóði upp á. „Það eru léttar skynvillur í þessari mynd þegar vel er að gáð. Kokteilarnir að fljóta upp úr lóðréttum glösum og menn, konur og dýr í herlegum gleðskap.“

Brandenburg gerði einnig auglýsingar fyrir Stuðmannatónleikana Tívolí. Sú herferð lukkaðist vel og uppskáru Stuðmenn og Brandenburg verðlaun FÍT og ÍMARK fyrir plakötin sem gerð voru fyrir tónleikana.