Fleiri börn fá nú ókeypis tannlækningar

Frá 1. janúar eru tannlækningar þriggja ára barna og barna á aldrinum átta til sautján ára greiddar að fullu af Sjúkratryggingum Íslands, að frátöldu 2.500 króna árlegu komugjaldi.

„Greiðsluþátttaka sjúkratrygginga er háð því að börnin séu skráð hjá heimilistannlækni,“ segir á heimasíðu landlæknis sem hvetur foreldra til að skrá börn sín í Réttindagátt Sjúkratrygginga Íslands á sjukra.is. Tannlæknar geti einnig séð um skráninguna. Mælt er með því að skrá barn hjá heimilistannlækni við eins árs aldur. Nú þegar eru tæplega 50 þúsund börn skráð í Réttindagáttina.

Tannlækningar eru nú gjaldfrjálsar fyrir þriggja ára börn og börn á bilinu átta til sautján ára. Einnig fyrir börn í bráðavanda eða sem búa við erfiðar félagslegar aðstæður. Tilvísun þarf til tannlæknis frá heilsugæslu, barnaverndar- eða félagsmálayfirvöldum og samþykki Sjúkratrygginga Íslands er skilyrði.

„Tannlæknaþjónusta barna verður innleidd í áföngum og þann 1. janúar 2018 verða tannlækningar allra barna yngri en 18 ára greiddar að fullu af Sjúkratryggingum Íslands, að frátöldu 2.500 kr. árlegu komugjaldi,“ segir landlæknir.