Biðja fólk um að leggja sér lið við flugeldaruslið

„Við höfum óskað eftir því að fólk hirði upp eftir sig sjálft flugeldaleifar af því sem það er að skjóta,“ segir Eygerður Margrétardóttir, deildarstjóri umhverfis- og úrgangsstjórnunar hjá umhverfis og skipulagssviði Reykjavíkurborgar.

„Hreinsun borgarlandsins er kostnaðarsöm á hverju ári og við höfum því beðið fólk um að leggja okkur lið,“ segir Eygerður og bendir á að endurvinnslustöðvar á höfuðborgarsvæðinu verði opnar í dag frá hálf eitt.

„Best er að skila flugeldaleifum í gáma á endurvinnslustöðvum og ósprengdum flugeldum á alltaf að skila í spilliefnagáma á endurvinnslustöðvum,“ segir Eygerður.

Starfsfólk Reykjavíkurborgar mun sjá um að hreinsa upp eins og unnt er með því fjármagni sem borgin hefur yfir að ráða. Hún segir erfitt að segja til um hversu mikið af flugeldaleifum liggi á götum og í görðum borgarinnar.

„Það tók að snjóa fljótlega eftir að það var skotið upp þannig það mun koma í ljós þegar snjóinn tekur að leysa,“ segir Eygerður Margrétardóttir.