49 ára Frakki líklegastur til að taka við Aston Villa

Aston Villa er í þriðja sinn á aðeins átta mánuðum að leita sér að nýjum knattspyrnustjóra eftir að Tim Sherwood var rekinn í gær daginn eftir að liðið tapaði á móti Gylfa Sigurðssyni og félögum í Swansea City.

Guardian slær því upp í morgun að Aston Villa sé á eftir Rémi Garde, fyrrum þjálfara franska liðsins Lyon og fyrrum leikmanns með Arsenal.

Samkvæmt heimildum Guardian þá verður Rémi Garde ekki sá eini sem forráðamenn Aston Villa ræða við en eins og staðan er í dag þá eru mestar líkur á því að þessi 49 ára gamli Frakki fái starfið.

Rémi Garde hefur verið atvinnulaus síðan að hann hætti með Lyon á síðasta ári en hann þjálfaði liðið frá 2011 til 2014.

Virtir stjórar eins og Arsene Wenger hafa hrósað Rémi Garde fyrir starf hans hjá Lyon en hann þykir mjög taktískur stjóri sem hefur gert vel í að vinna vel með ungum leikmönnum sem hentar framtíðarsýn Aston Villa vel.

David Moyes, Brendan Rodgers og Nigel Pearson hafa einnig verið orðaðir við starfið í ensku blöðunum en þangað að til að félagið finnur nýjan knattspyrnustjóra þá mun Kevin MacDonald stýra liðinu.

Tim Sherwood fær vænan starfslokasamning en Aston Villa þarf að greiða honum tvær milljónir punda eða um 396 milljónir íslenskra króna.

Tim Sherwood náði fínum árangri með Aston Villa eftir að hann tók við liðinu á síðustu leiktíð en það hefur lítið gengið á þessu tímabili. Aston Villa hefur ekki unnið leik síðan á fyrsta leikdegi tímabilsins og liðið hefur aðeins náð í eitt stig af síðustu 27 í boði í ensku úrvalsdeildinni. Sigur Sunderland á Newcastle í gær þýðir að Villa situr nú í botnsæti deildarinnar.