Biskup segir allt dregið í efa

„Það er sama hvað sagt er og gert er. Það er allt dregið í efa og stutt er í hugsanir um annarlegan tilgang eða hagsmunapot,“ sagði Agnes M. Sigurðardóttir biskup um þjóðfélagsumræðuna á Íslandi í nýársávarpi.

Agnes sagði þetta meðal annars stafa af því að ekki hefðu allir jöfn tækifæri til að lifa áhyggjulausu lífi. Hún vitnaði í orð Þóris Kr. Þórðarsonar guðfræðiprófessors sem sagði að þegar Guð hafi horfið úr vitund Evrópuþjóða hafi þær sundrast í hagsmunahópa.