Bandarísku heimsmeistararnir fá allar sína forsíðu hjá SI

Bandaríska kvennalandsliðið hefur heldur betur slegið í gegn í Bandaríkjunum eftir að liðið tryggði sér sinn fyrsta heimsmeistaratitil í sextán ár.

Sports Illustrated hefur ákveðið að endurskrifa tímaritssöguna til að halda upp á heimsmeistaratitilinn.

Bandarísku stelpurnar unnu 4-2 sigur á Japan í úrslitaleiknum á HM í Kanada og hefndu þar með fyrir tapið á móti Japan fjórum árum fyrr.

Þetta var þriðji heimsmeistaratitill bandaríska liðsins en sá fyrsti síðan liðið vann á heimavelli árið 1999.

Sports Illustrated vildi hafa nýkrýnda heimsmeistara á forsíðunni á næsta blaði en í stað þess að hafa allan hópinn saman eða flotta mynd frá fögnuðinum í Vancouver þá leyfðu útgefendur blaðsins að ganga lengra en nokkur annar.

Mörg tímarit hafa haft oft prentað nokkrar mismundandi forsíður en það er sögulegt að allir 23 leikmenn liðsins og þjálfarinn Jill Ellis fái hver og ein sér forsíðu.

Forsíðurnar eru reyndar 25 talsins því sú síðasta er af sjö leikmönnum bandaríska liðsins saman.

Markvörðurinn Hope Solo þakkaði fyrir sig og liðið inn á twitter-síðu sinni og fleiri úr liðinu munu örugglega bætast í hópinn.

Sumar af leikmönnunum 23 sem urðu heimsmeistarar á dögunum spiluðu nú ekki stórt hlutverk með liðinu en þær fá samt sem áður allar sína forsíðu.

Sports Illustrated kemur í sölu 20. júlí næstkomandi og það munu örugglega einhverjir safnarar reyna að komast yfir allar 25 útgáfurnar af blaðinu.