Gylfi Þór: Verðum að njóta þess að spila með Eiði Smára

Gylfi Þór Sigurðsson, leikmaður Swansea og íslenska landsliðsins, hefur spilað frábærlega í allan vetur fyrir velska liðið sem og íslenska landsliðið. Gylfi ræddi velgengni sína á tímabilinu í útvarpsþættinum Akraborgin á X977 í gær.

„Ég er mjög sáttur, allavega hingað til. Ég hef fengið að spila mjög mikið. Það hefur gengið vel hjá mér persónulega sem og Swansea og landsliðinu. Tímabilið í heild sinni hefur verið mjög gott,“ sagði Gylfi Þór.

„Við misstum mikilvægan mann sem spilaði upp á topp [Wilfried Bony]. Við þurftum að aðlagast því að spila með Gomis frammi. En eins og hann hefur sýnt í síðustu leikjum er hann byrjaður að skora mörk.“

Gylfi gekk aftur í raðir Swansea frá Tottenham. Han fékk aldrei að spila sína stöðu hjá Lundúnaliðinu og er oft borinn saman við leikmenn Spurs þegar það á við í enskum miðlum. Hefur það áhrif á hann?

„Nei, alls ekki. Þetta er eitthvað sem fylgir fótboltanum. Leikmenn eru bornir saman. Ég velti mér lítið upp úr þessu heldur reyni að standa mig vel fyrir mitt lið,“ segir Gylfi sem viðurkennir að það sé gaman að sýna Tottenham hvað það missti.

„Auðvitað er alltaf gott að geta sannað fyrir þeim sem höfðu ekki nógu mikla trú á manni að maður getur þetta. Auðvitað hefur gengið vel hjá mér en ég vil enda það ennþá betur en hefur gengið þannig vonandi næ ég að leggja upp nokkur mörk til viðbótar og skora nokkur í viðbót.“

Ísland vann Kasakstan, 3-0, í undankeppni EM 2016 í lok mars. Liðið spilaði vel og afgreiddi verkefni af fagmennsku.

„Þetta var erfiður leikur, ég verð að segja eins og er. Ferðalagið var langt og við spiluðum á gervigrasi sem við erum ekki vanir,“ sagði Gylfi Þór.

„Það gekk allt upp. Við skoruðum snemma í leiknum þannig hann opnaðist og það gerði okkur auðveldara um vik. Ef við hefðum ekki skorað í fyrri hálfleik hefði þetta spilast eins og leikurinn við Letta,“ sagði Gylfi Þór, en Eiður Smári Guðjohnsen sneri aftur í landsliðið í leiknum og spilað vel.

Gylfi játar því að það væri ekki leiðinlegt að hafa Eið Smára yngri í þessu liði, en hann er orðinn 36 ára gamall.

„Það væri auðvitað frábært að hafa hann aðeins yngri en hann er í dag. Hann er samt alveg nógu góður núna þannig við verðum að njóta þess á meðan hann spilar með okkur og nýta okkur hans reynslu og hæfileika þegar hann er heill og í góðu formi,“ sagði Gylfi Þór.

„Hann er mjög mikilvægur. Hann spilaði mjög vel í síðasta leik og skoraði. Það er mjög gott að hafa mann eins og hann inn á. Það er mikil ró yfir honum og hann er frábær með boltann. Svo án bolta býr hann til mikið svæði. Það er þægilegt fyrir okkur miðjumennina að gefa á hann.“

„Það er mjög gott að spila með honum. Hann er með auga fyrir sendingum sem koma framhjá varnarmönnum í fyrstu snertingu. Það er frábært að spila með honum,“ sagði Gylfi Þór Sigurðsson.

Allt viðtalið má heyra hér að neðan.