Geir á heimleið eftir 17 ár í fangelsi: Vill hjálpa öðrum sem leiðst hafa út á ranga braut

Kristín S. Bjarnadóttir og fjölskylda hennar vinna nú að komu Geirs Gunnarssonar fanga til landsins. Geir hefur dvalist í Greensville-fangelsinu í Virginíufylki í Bandaríkjunum undanfarin 17 ár en losnar úr fangelsinu hinn 14. september næstkomandi.

Kristín og dóttir hennar, Sóley María Kristínardóttir, hittu Geir í fyrsta sinn fyrir rúmu ári síðan eftir áralöng bréfaskrif. Kristín segir vináttu Geirs og fjölskyldunnar einstaka og er tilhlökkunin því í hámarki. Undirbúningsvinna er nú í fullum gangi og ætla þær að gera allt sem í þeirra valdi stendur til að koma honum aftur af stað í lífinu.

Sjá einnig: Hittast í fyrsta sinn eftir áralöng bréfaskrif

„Við erum að safna upp í búslóð, íbúð fyrir hann og erum að svipast um eftir vinnu. Hann óskaði eftir því að fá félagsráðgjöf og sálfræðiaðstoð þannig að við erum einnig búin að vera í samskiptum við félagsþjónustuna í Reykjavík,“ segir Kristín.

Hún segir Geir afar spenntan fyrir heimkomunni. Hann hyggist þó setjast að í Reykjavík en þær mægður búa á Akureyri. Þar þekki hann sig, en hann var síðast í Reykjavík árið 1995. Þær verði honum þó ávallt innan handar, enda löngu orðinn afar kær fjölskylduvinur.

Hátt í 200 manns boðið fram krafta sína

Þær stofnuðu hópinn Vinir Geirs á Facebook sem hugsaður er til samskipta fyrir vini hans og velunnara. Alls eru 140 manns í hópnum sem boðið hafa fram krafta sína. Þær stefna á að safna fyrir hann að minnsta kosti einni milljón króna. 

„Hann vinnur fimm tíma á dag á lager í fangelsinu og er með 90 sent á klukkutímann, sem er rétt rúmlega hundrað kall. Þegar hann ætlar svo að láta þvo af sér fötin þá þarf hann að borga tíu dollara. Þannig að hann gerir ekkert annað en að viðhalda sjálfum sér og á ekkert umfram. Hann hefur enga möguleika á að mynda sér sjóð,“ segir Kristín.

Vill aðstoða aðra

Kristín segir Geir vilja í framtíðinni leggja sitt af mörkum í forvarnir. Hans saga sé dæmigerð fyrir ungling sem leiddist inn á ranga braut í lífinu. „Hann sér svo eftir á hvernig hann hefði kannski mátt koma í veg fyrir þetta allt saman. Hann ætlar þó fyrst að finna sér vinnu til að afla sér tekna.“

Sjá einnig: Eins og við hefðum alltaf þekkst

„Ég er hjúkrunarfræðingur og sá það þegar ég hitti hann að hann verður að fá læknisaðstoð. Hann er örugglega vannærður og er með meiðsli á öxl og er mjög verkjaður. Ég þarf að athuga hvernig ég á að snúa mér í þeim málum enda verður hann ekki tryggður fyrr en eftir hálft ár,“ segir hún.

Geir er bjartsýnn á framtíðina að sögn Kristínar. Hann ritaði þeim bréf á dögunum þar sem hann sagðist varla geta beðið eftir að fá loks að opna dyr sjálfur, fá að anda að sér fersku lofti og ætlar sér jafnvel að fara út að hlaupa á nóttunni, bara því hann geti það. Hún segir þó að fyrsta skrefið sé að koma honum undir læknishendur.

Góður maður

Geir var dæmdur í tuttugu ára fangelsi fyrir alvarlega líkamsárás gegn öðrum manni árið 1998. Dómur Geirs er sagður duttlungum háður, ríkið skaffaði honum verjanda sem reyndist honum ekki hliðhollur. Bréfaskrif Kristínar og fjölskyldu hófust árið 2007 eftir viðtal sem birtist við Geir í Kastljósi og hittust loks í mars á síðasta ári.

„Hann er rosalega hlýr, gefandi og æðrulaus. Honum er mjög annt um sína nánustu og velferð þeirra og fylgist vel með þeim. Hann sendir hlý og gefandi bréf og getur ekki beðið eftir að fá að gera eitthvað samfélagslegt gagn,“ segir Kristín að lokum.

Þeir sem vilja leggja þeim lið er bent á eftirfarandi styrktarreikning:

Kennitala: 630307-0900

Reikningsnúmer: 0515-14-612840