Grunaður um að stela fatnaði fyrir hátt í milljón króna

Hæstiréttur hefur úrskurðað karlmann í gæsluvarðhald til 17. nóvember næstkomandi en hann er grunaður um fjársvik. Felast meint brot mannsins í því að hann sveik út flugmiða með því að gefa upp greiðslukortanúmer annars manns og þjófnaði á fatnaði. Héraðsdómur Reykjaness hafði áður dæmt manninn í farbann.

Maðurinn var í gæsluvarðhaldi frá 28. júlí til 26. ágúst en hefur verið í farbanni síðan þá grunaður um fjársvik þar sem hann sveik út flugmiða með illa fengnum greiðslukortaupplýsingum. Vegna þeirra sakargifta var gefin út ákæra á hendur manninum í síðustu viku, eða þann 4. nóvember.

Nokkrum dögum áður, þann 31. október, barst lögreglunni tilkynning frá ótilgreindu flugfélagi um að dagana á undan hefði ítrekað verið reynt að kaupa flugmiða á söluvef félagsins með illa fengnum greiðslukortanúmerum fyrir nafngreindan aðila, en um móður mannsins var að ræða.

Kom á söluskrifstofuna og greiddi fyrir flugmiðann með reiðufé

Grunur lögreglu beindist því að manninum en hann kom síðan á söluskrifstofu flugfélagsins og greiddi fyrir flugmiða móður sinnar með reiðufé. Var hann handtekinn vegna þessa þann 2. nóvember „og við skýrslutöku daginn eftir kannaðist hann við að hafa við bókun á farmiða gefið upp greiðslukortanúmer sér óviðkomandi,“ eins og segir í dómi Hæstaréttar.

Eftir að maðurinn var handtekinn leitaði lögreglan í herbergi á gistiheimili sem maðurinn hafði til umráða fannst þar ónotaður fatnaður með verðmerkingum fyrir tæpa milljón króna, eða 943.730 krónur. Maðurinn neitaði að gefa skýringar á því hjá lögreglu hvernig stæði á því að fötin hafi fundist í herberginu.

Að mati Hæstaréttar benda gögn málsins eindregið til þess að maðurinn hafi ítrekað brotið af sér á meðan fyrra brot hans var til rannsóknar. Því megi ætla að hann muni halda áfram uppteknu hætti ef hann gengur laus og var hann því úrskurðaður í gæsluvarðhald.