Partívæn ádeila

Ég hef samið frá því ég var bara lítið peð og samdi mjög hádramatísk ljóð sem barn,“ segir Tinna Sverrisdóttir hlæjandi, en hún brýtur í dag blað á listamannsferli sínum, því hún gefur út sitt fyrsta sólólag með hópnum Reykjavíkurdætrum á morgun. Lagið ber titilinn Heppin og samdi Tinna textann undir takt Lady Babuska, og fylgir því eftir í myndbandi lagsins, þar sem hún kemur fram ein síns liðs og er því um algjöra nýlundu að ræða innan hópsins.

Tinna, sem er menntuð leikkona, segir það þó aldrei hafa staðið til að gerast rappetta, það kom óvænt upp. „Það var ekki stefnan. Þegar ég var lítil dreymdi mig um að verða söngkona eða leikkona. Svo varð mér það ljóst á táningsaldri að ég yrði ekki söngkona,“ segir hún og hlær. Þrátt fyrir að hafa söðlað um með Reykjavíkurdætrum í rúm tvö ár er leiklistin hennar fag og fær hún útrás fyrir hana með dætrunum á sviði.

Hugmyndin að laginu kviknaði á ferðalagi. „Ég var að ferðast í fimm mánuði í Asíu með kærastanum mínum fjarri öllum sautján systrum mínum. Það var svo margt sem gerðist í þeirri ferð, margt sem ég upplifði algjörlega framandi. Að sjá aðra menningarheima og fólk á öðrum stað í lífinu en ég sjálf þótti mér lærdómsríkast,“ segir hún og heldur áfram: „Það kveikti einhvern eld hjá mér og ég ákvað bara að semja lagið á meðan ég var þarna úti og gerði það á Balí,“ segir hún og heldur áfram: „Sprettan að laginu var setningin Ignorance is bliss sem kom til mín þegar ég fór að setja saman hliðstæður af tveimur heimum.“

Lagið segir Tinna vera ádeilu á afþreyingarefni okkar og hversu auðvelt sé að aftengja sig atburðum sem eiga sér stað út í heimi.

Hún segir að þó að lagið fjalli um alvarleg málefni þá sé það samt sem áður partívænt. „Ég ákvað að fara inn í ádeiluna og búa til partílag með takti, stemningu og pínu grúvi. Markmiðið mitt var að fá fólk út á dansgólfið og það kannski staldrar við þegar það byrjar að hlusta. Og ég notaði pínu kaótískan stíl til þess að koma á framfæri því sem var í brennidepli hjá fjölmiðlum og mér persónulega,“ segir Tinna og nefnir sem dæmi kynferðisbrot, flóttamenn og hryðjuverk.

Hún segist bæði vera stressuð og spennt yfir því að senda lagið frá sér. „Þetta er svo viðkvæmt, maður er að deila á fyrsta heiminn sem maður sjálfur býr í en vill opna einhver augu og það er fín lína að verða ekki einhver predikari. Ég stíg inn í það hlutverk að vera tákngervingur alls þess sem ég er að gagnrýna í myndbandinu,“ segir hún og bætir við: „Sukkum, dettum í það og dönsum til að gleyma.“

Myndbandið við Heppin verður frumsýnt á Lofti hosteli á morgun klukkan 20.00 en því er leikstýrt af Dominique Gyðu Sigrúnardóttur og aðstoðarleikstjóri þess er Thelma Marín Jónsdóttir en myndbandið var tekið upp í Iðnó og auk Tinnu eru í því fjöldi leikara og dansara.