Ungur maður í sjálfsvígshugleiðingum kom að lokuðum dyrum

Ungur maður sem leitaði á bráðamóttöku um miðja nótt og bað um að tala við geðlækni, var sendur heim og sagt að geðdeildin opnaði klukkan tólf daginn eftir. Móðir hans segir að hann sé sem betur fer enn á lífi.  Hún upplifi þó mikinn vanmátt og hafi grátið þegar hún heyrði af þessu.

Aðstoðin liggur ekki lausu

Bráðamóttakan á að sinna bráðatilfellum á geðsviði þegar geðdeildin er lokuð. Móðir unga mannsins vildi vekja athygli á þessu vegna umræðunnar um sjálfsvíg ungra karlmanna en átakið Útmeða og vitundarvakningin Ég er ekki tabú, hafa orðið til þess að fleiri leita sér aðstoðar en hún liggur ekki á lausu.

Hún segir að fólk þurfi að vita að svona sé tekið á móti mönnum í þessum áhættuhópi. Hún spyr hvort þeim sem mæta á bráðamóttöku með brjóstverk sé sagt að koma aftur daginn eftir.

Og hún hefur samanburðinn. Drengurinn hennar var langveikur og þá sinnti honum fjöldi lækna. Þunglyndi hans og kvíða í dag má hinsvegar rekja til veikinda hans frá fæðingu en þar er litla hjálp að fá.

Ekki einsdæmi að koma að lokuðum dyrum

Anna Gunnhildur Ólafsdóttir framkvæmdastjóri Geðhjálpar segir þetta ekki einsdæmi þótt sjálfsvíg séu algengasta dánarorsök íslenskra karlmanna.

„Því miður, þá bara vitum við að það eru ekki allir að fá þá hjálp sem þeir þurfa á spítalanum,“ segir hún. „Við fáum bæði símtöl og tölvupósta um að fólki hafi verið vísað frá þótt því eða nánum aðstandanda hafi liðið mjög illa.“

Hún segir að það sé þrjátíu prósenta aukning hjá hjálparsíma Geðhjálpar eftir að farið var í þessi átaksverkefni. Það komi þó ekki á óvart ef þessi hópur sæki í auknum mæli eftir hjálp á geðdeildinni. Það sé þó því miður ekki einsdæmi að fólk komi að lokuðum dyrum hjá geðdeildinni. Leguplássum á geðsviði LSH hafi fækkað úr 240 í 118 á síðastliðnum 15 árum.

Nýtingin á rúmum þar sé 110 prósent. Það þýði í raun að deildin sé yfirfull. Það þurfi að grípa til aðgerða og það strax.