Eldsvoðinn á Írabakka: Sá hvernig svartur reykurinn smaug í gegnum hurðina

Lögregla telur líklegt að kveikt hafi verið í, í fjölbýlishúsi í Breiðholti í nótt, en eldur þar ógnaði lífi fjórtán manns. Íbúar segjast hafa verið mjög óttaslegnir en stigagangur hússins er afar illa farinn og ljóst að þar verður óíbúðarhæft á næstunni.

Íbúar að Írabakka 16 vöknuðu upp við vondan draum á þriðja tímanum í nótt. Eldur hafði komið upp við geymslur í kjallara hússins og stigagangurinn fyllst af þykkum svörtum reyk. 

Allt tiltækt slökkvilið var kallað út auk lögreglu og voru að störfum til klukkan fjögur í nótt. Reistur var stigi utan á húsið svo hægt væri að bjarga fjórtán manns niður að svölum íbúðanna og var viðbúnaður mikill eins og sést á þessum myndum sem teknar voru í nótt.

Þá var maður á miðjum aldri fluttur með reykeitrun á Landspítalann þar sem hann dvaldi næturlangt. Ludwig Leo Ludwigsson, sonur mannsins,  segist hafa haft miklar áhyggjur af föður sínum en fréttastofa náði tali af honum þar sem fjölskyldan var að pakka niður helstu nauðsynjum úr íbúðinni. 

„Ég vaknaði við að fólk öskraði að það væri kviknað í. Pabbi minn fer fram og opnar hurðina og krossbregður við að finna hitann og eldinn sem kom hérna inn. Manni bregður við þetta þar sem að faðir minn er lungnasjúklingur, þá hugsaði ég bara um að hann yrði í lagi, “ segir Ludwig.

Strætisvagn var kallaður á vettvang þar sem fólkið komst í skjól og naut aðstoðar fólks frá rauða krossinum.

Ekki verður hægt að búa í íbúðunum á næstunni. Ljóst er að mikið tjón hefur orðið, einkum af völdum sóts, og er mikið hreinsunarstarf framundan. 

Sigurlína Halldórsdóttir var með barnabörn sín í næturpössun þegar eldurinn kom upp. Hún var vakandi um nóttina þar sem hún hafði verið að þvo þvott.

„Ég sé bara hvernig reykurinn var að smjúga inn um hurðina.sá Ég hljóp inn og vakti börnin eitt, tveir og þrír og bara í fötin og út á svalir,“ segir hún.

Samkvæmt upplýsingum frá slökkviliði og lögreglu eru sterkar vísbendingar um að um íkveikju hafi verið að ræða, en þó liggur enginn undir grun. Rannsókn málsins er nú í höndum lögreglu sem lítur það alvarlegum augum, enda hafi viðkomandi ógnað lífi og limum fólksins í húsinu. Sigurlína segist slegin yfir atburðum næturinnar.

„Þetta var alveg rosalegt áfall. Ég hef aldrei lent í svona og guð forði því að fólk lendi í öðru eins. Maður bara hefur ekkert til að sofa í í nótt. Maður er bara að reyna að jafna sig og sjá hver verða næstu skref.“