Björn Þorláks gengur til liðs við Hringbraut

„Takk, kæru fjölmiðlanotendur og áhugafólk um lýðræði, að hafa sýnt því mikinn áhuga hvert leiðin liggur næst,“ segir blaðamaðurinn Björn Þorláksson sem gengið hefur til liðs við fjölmiðilinn Hringbraut.

Björn gegndi þangað til fyrir skemmstu ritstjórastöðu hjá Akureyri Vikublaði. Blaðið var eitt þeirra sem Björn Ingi Hrafnsson keypti á dögunum.

„Ekki séns í helvíti, Björn Ingi Hrafnsson,“ var svar Björns Þorlákssonar við því hvort hann gæti hugsað sér að starfa fyrir borgarfulltrúann fyrrverandi og núverandi fjölmiðlamógúl.

„Ég gæti aldrei átt trúnað við þig, því ég trúi ekki að þú hafir trúnað við almannahagsmuni að leiðarljósi með þinni útgáfustarfsemi. Held að þín áhersla sé á hreina sérhagsmuni. Sjálfstæðir og reyndir blaðamenn eru ekki skógarþrastarungar sem bíða með opinn gogginn eftir þínum peningum, sem enginn veit hvaðan koma. Lifi frelsið og gagnrýnin upplýsing. Netið færðu seint keypt upp!“

Kveðju-Stund

Björn upplýsir að um 100 prósent stöðu verði að ræða hjá Hringbraut. Hann muni því ekki rita fleiri pistla á vef Stundarinnar. Hann segist alsæll með samskipti sín við nýtt og áður kunnugt starfsfólk Hringbrautar.

„Til marks um trú mína og ástríðu sem kviknað hefur vegna fyrirhugaðra starfa má nefna að eftir langan fund í fyrradag að Sundagörðum, þar sem Hringbraut er til húsa, gekk ég í einum rykk með bros á vör út á Reykjavíkurflugvöll og beint upp í vél norður,“ segir Björn. Stærðarinnar kleinuhringur frá Dunkin' Donuts varð á vegi Björns.

„Á leið minni varð dansandi kleinuhringur á Laugaveginum sem gaf til kynna að Reykjavík og landinu öllu gæti vel borist norðlenskur liðsauki, en ég mun bæði starfa í hinu sæta suðri og bjarta norðri. Það skiptir ekki öllu hvar maður hefur næturstað. Mestu varðar að muna að frjálsir fjölmiðlar eru hornsteinar heilbrigðs lýðræðis og ég mun alltaf reyna að starfa í samræmi við ábyrgð og skyldur fjölmiðlafólks út frá því mikilvæga hlutverki.“

Takk, kæru fjölmiðlanotendur og áhugafólk um lýðræði, að hafa sýnt því mikinn áhuga hvert leiðin liggur næst.Svarið...

Posted by Björn Þorláksson on Friday, August 7, 2015