„Man alveg alla fyrirlitninguna, uppnefningarnar og andlega ofbeldið“

Páll Óskar Hjálmtýsson er búinn að vera poppstjarna Íslands í 20 ár. Hann fæddist í Reykjavík þann 16. mars árið 1970 og fagnaði því 45 ára afmæli sínu í gær.

Af því tilefni var opnuð sýning um feril hans á Rokksafninu í Reykjanesbæ á sunnudaginn og Ísland í dag kíkti á sýninguna með stjörnunni sjálfri og fór yfir ferilinn.

„Þetta er allt mitt líf, þetta er meira en ferillinn. Þetta er bara frá því ég fæddist. Mamma mín hélt að ég yrði fatahönnuður af því að ég var alltaf að teikna svo mikið, sérstaklega dúkkulísur,“ segir Palli.

Aðspurður segir hann nokkuð flókið að segja nákvæmlega til um hvenær ferillinn byrjaði.

„Ég vann svolítið mikið sem barn og allar upptökur sem ég hef sungið inn á plötur, og meira til, má heyra allt hérna. En ég lít svo á að lætin hafi byrjað þegar Rocky Horror-sýningin var sett upp af leikfélagi MH.“

Þetta var í janúar árið 1991 og Páll Óskar kom fram í þætti Hemma Gunn, Á tali. Hann segir að eftir þáttinn hafi síminn byrjað að hringja og hann hafi sem betur fer ekki hætt að hringja síðan.

Lærði mest á floppinu

Palli gaf svo út sína fyrstu sólóplötu árið 1993, Stuð. Hann segir það hafa verið fyrstu plötuna sem hann tók upp á sínum eigin forsendum. Sama ár, og nánast í sama mánuði og Stuð kom út, byrjaði Palli að spila með Millunum.

En ferillinn hefur ekki alltaf verið dans á rósum. Hann var til dæmis hársbreidd frá gjaldþroti í kringum aldamótin í kjölfar útgáfu plötunnar Deep Inside sem „floppaði“.

„Þetta er albesta lexía sem ég hef lært í lífinu. Þarna lærði ég það að þú lærir ekki neitt fyrr en fyrsta „floppið“ kemur. Þú lærir ekki neitt á meðan það gengur allt æðislega vel en þarna lærði ég að líta í eigin barm og fara með peninga.“

Palli segir að það hafi tekið hann sex ár að vinna sig út úr skuldafjallinu sem fylgdi Deep Inside. En hvernig leið honum á þessum tíma?

„Þessi ár voru ekkert einföld en mér leið samt verr á 90‘s-tímabilinu. Það var ekkert grín að koma út úr skápnum á þessum tíma og ég man alveg alla fyrirlitninguna, allar uppnefningarnar og allt andlega ofbeldið. [...] Ég sé það núna á sjálfum mér hvað ég var hengdur upp á þráð og hvað mér leið í raun og veru illa. Þetta var ekkert grín,“ segir Palli.

Viðtalið við hann í heild sinni má sjá í spilaranum hér að neðan.