Spáði því að Ísland yrði komið í Evrópusambandið árið 2015

Halldór Ásgrímsson, þáverandi formaður Framsóknarflokksins og forsætisráðherra, spáði því fyrir níu árum að Íslendingar yrðu orðnir fullgildir aðilar að Evrópusambandinu árið 2015. Þessi ummæli Halldórs voru rifjuð upp í fréttum Stöðvar 2 í kvöld í ljósi kúvendingar forystu Framsóknarflokksins í Evrópumálum.

Við ætlum að fara með ykkur níu ár aftur í tímann, til fundar sem haldinn var á Hilton Nordica hótelinu í Reykjavík í febrúar árið 2006. Viðskiptaþing var að hefjast, aðalræðumaðurinn var forsætisráðherrann Halldór Ásgrímsson og helstu viðskiptajöfrar þess tíma voru mættir til að hlýða á boðskapinn, einnig forystumenn í stjórnmálunum.

Á þessum tíma var Halldór orðinn helsti talsmaður þess að aðild að Evrópusambandinu yrði tekin á dagskrá. Hann efaðist um að Íslendingar gætu áfram búið við krónuna sem sjálfstæða mynt: 

„Við verðum að viðurkenna að sveiflur í gengi íslensku krónunnar eru vandamál og spurningar eru uppi um möguleika lítilla gjaldmiðla á frjálsum fjármálamarkaði. Ég ætla að leyfa mér að setja fram þá spá að við verðum orðnir fullgildir aðilar að Evrópusambandinu árið 2015,“ sagði Halldór á Viðskiptaþingi árið 2006. Ræðu hans má lesa í heild sinni hér.

Og nú er árið 2015 runnið í garð og það virðist nokkuð óhætt að fullyrða að þessi spá fyrrum formanns Framsóknarflokksins mun varla rætast.  Flokkurinn hefur í millitíðinni tekið u-beygju. Í stað þess að stefna ákveðið í átt til Evrópusambandsins stefna forystumenn hans nú að því að útiloka þann möguleika sem allra fyrst og með sem rækilegustum hætti inn í langa framtíð.