Leitin að Þorleifi heldur mögulega ekki áfram á morgun

Leitin að Þorleifi Kristínarsyni, tvítugum Íslendingi sem týndist í danska bænum Frederikshavn um helgina, hélt áfram í dag en hún verður mögulega blásin af á morgun. Hans var leitað í höfninni í dag og í gær en lögregla sagði dönskum miðlum í dag að leitinni yrði mögulega hætt ef engar nýjar upplýsingar kæmu fram í málinu í dag.

Frá þessu er greint á vefnum Nordjyske.dk. Síðast sást til ferða Þorleifs eldsnemma á laugardagsmorgun. Upptökur úr öryggismyndavélum sýna hann þá ganga út af skemmtistað í bænum og halda í átt að höfninni. Þar sést maður sem líkist Þorleifi klifra inn á afgirt hafnarsvæði.

Lars Jensen lögreglustjóri segir í viðtali við Nordjyske að lögregla telji líklegt að Þorleifur hafi endað í höfninni. Hans verði mögulega ekki leitað áfram á morgun.