Samstarfssáttmáli Sjálfstæðisflokks og Bjartrar framtíðar lagður fram í Hafnarfirði

Bæjarfulltrúar Sjálfstæðisflokksins og Bjartrar framtíðar hafa gert með sér sáttmála um myndum meirihluta bæjarstjórnar. Þetta kemur fram í fréttatilkynningu.

Á fundi Bæjarstjórnar Hafnarfjarðar sem nú var að ljúka var lagður fram samstarfssáttmáli  meirihluta Bæjarstjórnar Hafnarfjarðar 2014 – 2018 og kosið í ráð og nefndir á vegum bæjarins.

Guðlaug Kristjánsdóttir frá Bjartri framtíð var kosin forseti bæjarstjórnar og  Rósa Guðbjartsdóttir, Sjálfstæðisflokki, formaður bæjarráðs.

Í sáttmálanum kemur fram að áhersla sé lögð á ábyrga langtímahugsun í stefnumótun og  stjórn bæjarins. Skýr markmið og sátt um framtíðarsýn sé grunnar að farsælu verki. Því verði á kjörtímabilinu unnið að gerð langtímastefnu um framtíð bæjarins og leitað eftir frumkvæði og þátttöku bæjarbúa og samstöðu innan bæjarstjórnar.

Rósa Guðbjartsdóttir  formaður bæjarráðs segir spennandi tíma framundan í Bæjarstjórn Hafnarfjarðar og það sé tilhlökkun í hópnum að takast á við þau verkefni sem framundan eru. „Við munum leggja okkur fram við að eiga jákvætt og uppbyggilegt samstarf við alla bæjarfulltrúa og um leið að efla samtal bæjarstjórnar við bæjarbúa.“