Romario spáir því að Neymar bæti met Pele

Neymar, framherji Barcelona og Brasilíu, hefur raðað inn mörkum með félagsliði og landsliði að undanförnu og nú er hann farinn að nálgast eitt virtasta met í brasilíska fótboltanum.

Pele skoraði 77 mörk í 92 landsleikjum fyrir Brasilíu og er langmarkahæsti leikmaður brasilíska landsliðsins á undan þeim Ronaldo (62), Romario (55) og Zico (48).

Neymar, sem er aðeins 22 ára gamall, er nú kominn upp í fimmta sæti listans en hann hefur skorað 40 mörk í 58 landsleikjum. Romario spáir því að Neymar slái met Pele.

„Þrátt fyrir að hann sé ennþá ungur þá veit Neymar vel hvað hann skiptir miklu máli fyrir fótboltann í heiminum og þá sérstaklega brasilíska fótboltann. Hann er leikmaður sem öll brasilíska þjóðin trúir á og hann hefur allt til alls til að endurskrifa söguna," sagði Neymar í viðtali við Lancenet-blaðið.

„Hann er enn bara 22 ára og kominn nálægt þremur markahæstu leikmönnum landsliðsins frá upphafi. Ef hann heldur áfram á sömu braut þá mun hann bæta met Pele," sagði Romario.