Óttast stórbruna og loka bílakjallara í Hamraborg

Eldsvoði í bílageymslunni í Hamraborg 14 til 38 gæti orðið að stórbruna sem slökkvilið ræður illa við vegna lélegra brunavarna. Loka á bílakjallaranum á þrettánda degi jóla.

„Á síðustu árum hefur slökkviliðsstjóri ítrekað krafist úrbóta á eldvörnum bílageymslunnar og verður að teljast fullreynt,“ segir Bjarni Karlsson, sviðsstjóri hjá Slökkviliði höfuðborgarsvæðisins, í bréfi til húsfélagsins.

Húsfélaginu, svokölluðu Hamraborgarráði, var í bréfi Bjarna frá 12. nóvember gefinn frestur til 24. nóvember til að leggja fram staðfestingu á að eldvarnirnar yrðu bættar. Slík staðfesting barst ekki.

„Vatnsúðarakerfi geymslunnar er með öllu óvirkt og án alls viðhalds og eftirlits af hálfu eigenda. Þá vantar hólfandi rennihurð að bensínstöð, út- og neyðarlýsingu er mjög ábótavant, brunahólfanir hafa verið rofnar að aðliggjandi rýmum og vafi leikur á brunahólfum í loftræstikerfum,“ dregur Bjarni saman um það helsta sem er í ólagi.

Eigendur að Hamraborg eru yfir 210 talsins; einstaklingar sem eiga þar íbúðir og fyrirtæki auk Kópavogsbæjar sem á 18 prósent í fasteigninni. Bærinn greiðir hins vegar 55 prósent kostnaðar við rekstur og endurbætur á bílageymslunni.

Í apríl á þessi ári voru opnuð níu tilboð sem bárust útboði í vatnsúðarakerfi sem aðalfundur Hamraborgarráðsins hafði samþykkt að efna til.

Leggja átti fram tillögu stjórnar um að semja við AH Pípulagnir um verkið á fundi í ráðinu 27. nóvember. Gjaldkeri félagsins lagði hins vegar fram nýja tillögu með þrengri fjárheimildum sem fjölmennur félagsfundur samþykkti. Kópavogsbær segir þá samþykkt brjóta í bága við útboðsskilmálana og að hvorki bærinn né AH Pípulagnir samþykki niðurstöðuna. Fullri ábyrgð sé lýst á hendur Hamraborgarráðinu á því að ekki sé hægt að setja upp vatnsúðarakerfið.

„Framganga Hamraborgarráðsins í þessu máli á líklega eftir að valda fyrirtækjum, íbúum og öðrum þeim sem leið eiga í Hamraborgina miklum óþægindum og fasteignaeigendum í Hamraborg 14-38 óþarfa kostnaði,“ segir í dreifibréfi Kópavogsbæjar til hagsmunaðila í húsinu. Bærinn sé þó tilbúinn að koma aftur að borðinu á fyrri grundvelli „en ekki forsendum samþykktrar tillögu gjaldkera Hamraborgarráðsins“.

Búast má við mikilli röskun verði bílahúsinu lokað, meðal annars vegna skorts á öðrum bílastæðum og við sorphirðu.