Búseti lækkar gjöld á leigjendur

Mótvægisaðgerðir Búseta á Norðurlandi með niðurskurði á rekstrarkostnaði og frestun á viðhaldi lækka verulega leigu á félagslegum íbúðum í eigu félagsins. Þetta er mat Benedikts Sigurðarsonar, framkvæmdastjóra Búseta á Norðurlandi.

Fréttablaðið sagði frá því í gær að Búseti á Norðurlandi hafi ákveðið að hækka leigu á félagslegum íbúðum um 13 prósent frá og með næstu áramótum. Hið rétta er að fjármagnsliður félagslegra íbúða á Akureyri hækkar um 13 prósent eða rúm tíu prósent umfram verðbólgu.

Á móti mun Búseti á Norðurlandi lækka rekstrarsjóðsgjöld um tvö þúsund krónur á mánuði og hætt verður að innheimta fast gjald vegna aðgangs að þjónustu umsjónarmanns. Einnig verður fast viðhaldsgjald lækkað.

Gjaldskrárbreyting felur þannig í sér að hækkun á mánaðargjaldi í félagslegum íbúðum á Akureyri verður minnst 2,15 prósent og mest 4,5 prósent, en ekki 13 prósent eins og var sagt í Fréttablaðinu í gær.