Tjónið metið hátt í 200 milljónir króna

„Það voru einhverjir gámar sem krömdust á dekkinu við þessi læti, en tuttugu sem fóru í sjóinn. Það er hins vegar ekki vitað hvort það kom brot á skipið eða hvort álagið á skipið hafi verið svona mikið með þeim afleiðingum að gámarnir fóru útbyrðis,“ segir Ólafur William Hand, upplýsingafulltrúi Eimskips, um skaðann sem varð á farmi flutningaskipsins Dettifoss á leiðinni til Íslands rétt fyrir jólin.

Nú er komið í ljós að 26 gámar töpuðust eða urðu fyrir skemmdum. Nú liggur fyrir að fimm lúxusjeppar af Mazda-gerð fóru í sjóinn, en flestir gámarnir innihéldu dagvöru ýmiss konar, fóður og varahluti svo dæmi sé tekið.

Ólafur segir að skemmdirnar á Dettifossi séu litlar, en áætlað tjón á farmi skipsins er reiknað út frá þeirri þumalputtareglu tryggingarfélaga að hver gámur, sem telst tvær gámaeiningar, innihaldi varning að andvirði 50 þúsund Bandaríkjadollara eða 6,4 milljóna íslenskra króna. Tjónið er metið allt að 166 milljónir með þessari reiknireglu. Við þetta bætist skaði sem varð fyrr í desember þegar fjórir gámar töpuðust af Goðafossi og nálgast því 200 milljónir þegar allt er talið.

„Hvert tjónið er nákvæmlega fáum við sennilega aldrei að vita, hver og einn viðskiptavinur skiptir við sitt tryggingarfélag hvað það varðar,“ segir Ólafur.

Fjöldinn allur af gámum fellur frá borði á flutningaskipum ár hvert, en Ólafur segir að lítil hætta skapist þess vegna. Flestir gámarnir sökkvi strax en aðrir rifni fljótlega með sömu niðurstöðu. Hins vegar sé staðsetning þeirra strax gefin upp svo aðrir sjófarendur séu meðvitaðir um að farmur hafi tapast.

„Vissum reglum er fylgt. Það er haft samband við landhelgis- eða strandgæslu þeirra landa sem næst liggja og gefin upp staðsetning á öryggistíðni skipa svo menn viti af þessu,“ segir Ólafur.

Eins og komið hefur fram hefur veður og aðstæður á hafinu á milli Íslands og Evrópu verið afar slæmt síðan í nóvember. Spurður hvort Dettifoss hafi fengið á sig brot þegar gámarnir fóru í sjóinn svarar Ólafur því til að það liggi ekki fyrir nákvæmlega. „Þetta eru mikil öfl sem við er að eiga og ekki útilokað að tjónið sé af því að álagið í þessum brælusjó hafi orðið svo mikið að svona fór.“