Fingralöng fór ránshendi um spítalann

Þjófur fór ránshendi um Landspítalann í Reykjavík fyrir nokkru. Þjófurinn komst yfir föt starfsmanns og stal víða um spítalann. Þetta staðfestir Anna Sigrún Baldursdóttir, aðstoðarmaður forstjóra LSH.

Atvikið átti sér stað í októbermánuði og var kært til lögreglu. Það atvikaðist þannig að þjófurinn, kona á besta aldri, klæddi sig í starfsmannaföt og stal víða á spítalanum. Hún náði að komast yfir starfsmannakort og hafði þar af leiðandi aðgang að helstu stöðum spítalans.

Á Landspítalanum starfa um 4.600 einstaklingar og eru þeir allir með aðgangskort. Þjófurinn náði að hafast við á spítalanum í nokkra klukkutíma. Gekk hún um rými spítalans í Fossvogi óáreitt og náði að komast yfir ýmsa verðmæta hluti á ferðum sínum um húsakynnin. Hún hóf ránsferð sína í Fossvogi en náðist ekki fyrr en hún var komin inn í byggingar Landspítalans við Hringbraut.

Þar gekk hún inn á kaffistofu. Starfsmenn sem þar voru fyrir könnuðust ekki við konuna og var hún í annarlegu ástandi. Hún náði ekki að gefa upp nafn sem passaði við aðgangskortið sem hún hafði og var því stöðvuð af öryggisvörðum.

Á þessum tíma sem hún athafnaði sig náði hún að koma höndum yfir ýmislegt smálegt; síma starfsmanna, lykla og annað sem varð á vegi hennar. Lögregla fann bæði hluti á henni og við húsleit á heimili hennar. Gerandinn hefur áður komist í kast við lögin og hefur átt við andleg veikindi að stríða. Hún gaf þá ástæðu fyrir þjófnaðinum að hún væri að reyna að fjármagna eigin fíkniefnaneyslu.

Konan komst ekki í lyf á spítalanum. Öll lyf spítalans eru geymd í lokuðum og læstum lyfjaskápum þar sem starfsmenn á vöktum geyma þá lykla sérstaklega.

Enginn yfirmaður á Landspítalanum vildi tjá sig um málið við fréttastofu þegar eftir því var leitað. Málið er upplýst og ekki hefur enn verið tekin ákvörðun hvort verklagi verður breytt á spítalanum til þess að fyrirbyggja að atvik sem þessi geti átt sér stað aftur.