Rétt og skylt að ræða við vitni

Lögmannafélag Íslands ályktaði á félagsfundi nýlega að lögmanni sé rétt og geti eftir atvikum verið skylt að hafa samband við vitni í máli.

„Hafi lögmaður samskipti við vitni ber honum að gæta tillitssemi og forðast að hafa áhrif á framburð vitnis. Lögmenn sem gæta að þessu gæta faglegra vinnubragða og sem samrýmast þeim siðareglum sem gilda um störf þeirra,“ segir í ályktuninni.

Stjórn félagsins hefur samþykkt tillögu um breytingar á siðareglum félagsins þessu til staðfestingar sem síðan fer aftur fyrir félagsfund.

Aðdragandinn að ályktuninni eru aðfinnslur sem Héraðsdómur Reykjavíkur gerði við störf lögmannanna Harðar Felix Harðarsonar og Ólafs Eiríkssonar í Al-Thani-málinu svokallaða. Aðfinnslurnar sneru að fundi lögmannanna með fjórum vitnum málsins fyrir aðalmeðferð þar sem þau kynntu sér gögn málsins. Var talið að með því að ræða við vitnin fyrir aðalmeðferðina og sýna þeim sönnunargögn hefði verið farið á svig við lög og það væri til þess fallið að rýra trúverðugleika vitnanna.