Leiðréttingin bara að hluta til örorkuþega

Örorkulífeyrisþegar geta ekki nýtt sér úrræði ríkisstjórnarinnar um að nota hluta tekna sinna skattfrjálst inn á höfuðstól fasteignaveðlána sinna.

Það úrræði ríkisstjórnarinnar að veita landsmönnum heimild til að færa séreignasparnað sinn inn á höfuðstól fasteignalána nýtist aðeins þeim sem eru á vinnumarkaði.

Bergur Þorri Benjamínsson, varaformaður Sjálfsbjargar, telur að ekki ríki jafnræði milli þeirra sem vilja greiða í séreignasparnað, hvort sem þeir eru örorkubótum eða ekki. Hann telur að lögin hafi ekki verið hugsuð nógu langt til þess að gæta jafnræðis á meðal allra aðila.

„Að mínu mati á ekki að banna örorkulífeyrisþegum að greiða að hámarki 4 prósent tekna sinna í séreignasparnað vilji þeir það. Við erum heldur ekki að fara fram á mótframlag, heldur aðeins að við getum nýtt okkur þetta úrræði,“ segir Bergur Þorri.

Aðgerðir núverandi ríkisstjórnar til skuldaniðurfellingar verðtryggðra húsnæðisskulda eru tvíþættar.

Annars vegar er niðurfærslan sjálf og einnig heimild til að nota séreignasparnað sinn inn á húsnæðislán. Heimilt er upp að vissu hámarki að ráðstafa greiddum viðbótarlífeyrissparnaði til að greiða inn á höfuðstól veðlána sem tekin voru vegna kaupa á íbúðarhúsnæði til eigin nota. Heimildin nær bæði til eigin framlags launþega og framlags launagreiðanda.

Greiðslur í séreignasjóði eiga alfarið að fara í gegnum launagreiðanda og ekki er hægt að greiða sjálfur í séreignasjóð og færa til frádráttar frá tekjustofni. Tryggingastofnun greiðir út lífeyrisgreiðslur og samkvæmt lögum eru greiðslur Tryggingastofnunar ekki laun. Því er ekki hægt að greiða í séreignasjóði af örorkugreiðslum.

Samkvæmt upplýsingum frá Tryggingastofnun áttu 8.823 örorkulífeyrisþegar fasteign í desember árið 2013. Því er hér um nokkurn fjölda einstaklinga að ræða sem nær ekki að nýta sér þetta úrræði ríkisstjórnarinnar.