Góður samningur fyrir Þingeyri og Flateyri

„Við fögnum þessari niðurstöðu og þessari samfélagslegu ábyrgð sem fyrirtæki eru að sýna þarna þrátt fyrir að þetta séu keppinautar í viðskiptum með fiskinn,“ segir Finnbogi Sveinbjörnsson, formaður Verkalýðsfélags Vestfirðinga.

Fyrirtækin Arctic Oddi ehf., Valþjófur ehf. og Vísir hf. komust á fimmtudag að samkomulagi sem á að styrkja stoðir atvinnulífsins á Flateyri og Þingeyri. Samkomulagið felur í sér að Arctic Oddi mun flytja fiskvinnslu sína frá Flateyri í húsnæði á Þingeyri sem var áður í eigu Vísis. Við það skapast 15 störf við vinnslu og pökkun á eldisfiski og frekari uppbyggingu á fiskeldi fyrirtækisins.

Fiskvinnslufyrirtækið Valþjófur tekur við fasteignum og tækjum Arctic Odda á Flateyri og gerir ráð fyrir að skapa um 20 ársstörf. Aðkomu Vísis að útgerð og vinnslu á Þingeyri lýkur með samkomulaginu en það er gert með fyrirvara um samþykki Byggðastofnunar.

„Vissulega verða þetta færri störf til að byrja með en þetta er auðvitað töluvert meiri vinnsla en stefndi í því við vorum farin að gera ráð fyrir að fiskvinnsla myndi nánast leggjast af á báðum stöðum,“ segir Finnbogi og heldur áfram.

„Þetta byggir að stóru leyti á því að Byggðastofnun sýni samstarfsvilja varðandi sérstakan byggðakvóta þannig að fyrirtækinu Valþjófi verði gert kleift að blómstra á Flateyri. Þetta eru heimamenn sem hafa sterkar rætur á Vestfjörðum og ætla sér að halda áfram að byggja upp.“