Kalla eftir frekari lækkun vaxta

Þorsteinn Víglundsson, framkvæmdastjóri Samtaka atvinnulífsins, kallar eftir frekari vaxtalækkun Seðlabanka Íslands í nýrri grein sem birt var á föstudag.

Þorsteinn segir mikla hjöðnun verðbólgu undanfarið gefa tilefni til frekari stýrivaxtalækkana en þeirrar sem varð fyrir skömmu um 0,25%. Kaupmáttur hafi aukist um nærri 5% að meðaltali ásamt því sem verðbólga hafi farið hjaðnandi.

„Sú verðlækkun sem varð í október felur í sér að virkir raunstýrivextir bankans hafa hækkað umtalsvert og eru nú komnir yfir 4%. Viðmið bankans hefur verið að raunvextir séu í kringum 3% þegar efnahagslífið fer úr slaka í spennu, eins og um þessar mundir. Ljóst er því að umtalsvert svigrúm hefur skapast fyrir vaxtalækkun,“ segir í greininni.

Þorsteinn segir mikilvægt að góður árangur í hagstjórn skili sér í lægri raunvöxtum og því sé brýnt að Seðlabankinn lækki vexti enn frekar við næstu vaxtaákvörðun þann 10. desember.