Leggja niður starf bæjarritarans

„Við erum að endurskipuleggja strúktúrinn hjá okkur miðað við þá þróun sem orðin er síðan við breyttum síðast skipulaginu á árinu 2008,“ segir Haraldur Sverrisson, bæjarstjóri í Mosfellsbæ, um fyrirhugaðar breytingar á skipuriti bæjarins.

Breytingin er gerð í kjölfar úttektar Capacent á stjórnskipulaginu. Stjórnsýslusvið og menningarsvið eru lögð niður og verkefnin færð annað. Eftir verða fræðslusvið, fjölskyldusvið og umhverfissvið og þrjár stoðdeildir. Starf framkvæmdastjóra stjórnsýslusviðs, sem áður hét bæjarritari, er lagt niður en ráða á lögmann á eina stoðdeildina.

Bæjarstjórn á eftir að afgreiða breytinguna. Fulltrúar minnihlutans í bæjarráði kvörtuðu undan að hafa ekki verið hafðir með í ráðum.

„Þetta er ekki póltísk stefnumótun,“ segir Haraldur. „Það komu í ljós ákveðnir annmarkar á skipulaginu hjá okkur og bæjarstjóri og embættismenn í samvinnu við ráðgjafa Capacent hafa unnið þessar tillögur sem lagðar eru fyrir bæjarráð og bæjarstjórn.“