Stjórn sjóðsins enn einum manni færri

Enn hefur enginn verið skipaður í stjórn Íbúðalánasjóðs í stað Steinunnar Valdísar Óskarsdóttur. Steinunn, sem var fulltrúi Samfylkingarinnar í stjórninni, sagði sig úr henni á dögunum. Taldi hún sér ekki fært að sitja í stjórninni þar sem stjórnin væri ekki stefnumarkandi um mál sjóðsins. Eftir það sendi Árni Páll ráðherra bréf og sagðist ekki tilnefna í stjórnina að svo stöddu.

Samkvæmt upplýsingum Fréttablaðsins er varamaður Steinunnar fulltrúi Bjartrar framtíðar og hefur hann setið þá fundi sem hafa verið haldnir. Stjórnarfundir ganga því eðlilega fyrir sig.

Ingibjörg Ólöf Vilhjálmsdóttir, formaður stjórnar Íbúðalánasjóðs, segir að starfsemi Íbúðalánasjóðs sé lögbundin og það sé skýrt kveðið á um hlutverk stjórnar og skýrt kveðið á um hlutverk ráðuneytisins. Að auki hafi Alþingi vissu hlutverki að gegna.

„Svona hefur þetta verið í mjög langan tíma og Árni Páll þekkir sögu Íbúðalánasjóðs mjög vel. Ég hef trú á að hann hafi komið að ýmsum málum þar í gegnum tíðina,“ segir Ingibjörg. Ekkert hafi breyst nema árið 2012 hafi Íbúðalánasjóður að hluta til orðið fjármálastofnun og lýtur því eftirliti Fjármálaeftirlitsins.