Hnífjafnt hjá Skotum í nýrri könnun

Fimmtíu og eitt prósent kjósenda í Skotlandi segist vilja að landið verði sjálfstætt, samkvæmt könnun sem dagblaðið The Sunday Times birti í gær. Fjörutíu og níu prósent vilja halda sambandinu við Bretland. Það er enn frekara áhyggjuefni fyrir sambandssinna að leiðtogi þeirra, Alistair Darling, nýtur minna trausts en leiðtogi sjálfstæðissinna, Alex Salmond. Um 40 prósent kjósenda segjast treysta Salmond en aðeins 30 prósent Darling.

Stjórnmálaskýrendur benda á að þrátt fyrir að nánast enginn marktækur munur sé nú á fylgi fylkinganna samkvæmt könnuninni séu skýr merki um að fylgi sjálfstæðissinna sé í uppsveiflu.

Þetta er í fyrsta sinn sem sjálfstæðissinnar leiða í könnunum. Það eru aðallega konur, kjósendur undir fertugu og láglaunafólk sem hefur skipt um skoðun og vill nú sjálfstæði, samkvæmt YouGov sem gerði könnunina.

„Þessi tímamótakönnun sýnir að Já-hreyfingin hefur vindinn í bakið, en við höfum enn mikið verk að vinna ef við ætlum að sigra í kosningunum,“ segir Nicola Sturgeon, einn af leiðtogum sjálfstæðissinna.

„Fleiri og fleiri eru að átta sig á því að atkvæði greitt sjálfstæði gefur tækifæri til þess að nýta auðlindir landsins betur í þágu þeirra sem búa hér. Skapa fleiri störf og verja mikilvæga grunnþjónustu, eins og heilsugæsluna, sem stjórnmálamenn í London vilja einkavæða,“ bætir hún við.

Alistair Darling benti á að skoðanakönnunum síðustu daga bæri ekki alveg saman. Til dæmis birtist önnur skoðanakönnun í gær sem sýndi sambandssinna með fjögurra prósentustiga forskot. „En skilaboðin sem ég tel birtast í þessu eru skýr: Ef þú vilt að Skotland verði áfram hluti af Bretlandi, þá verður þú að kjósa. Aðskilnaður er endanlegur. Þessar skoðanakannanir eru áminning til allra þeirra sem héldu að úrslitin væru ráðin. Það var og verður ekki þannig.“

Stjórnvöld í London, sem vilja eindregið halda sambandi við Skota, voru fljót að bregðast við með útspili sem sagt er að eigi að höfða til óákveðinna kjósenda. George Osborne fjármálaráðherra kynnti hugmyndir um að færa skoska þinginu aukið fjárveitingavald.

„Við munum kynna þær hugmyndir frekar á allra næstu dögum,“ sagði Osborne í viðtali á BBC í gær. Hann ítrekaði í viðtalinu að Skotum stæði ekki til boða að halda breska pundinu ef þeir kysu sjálfstæði. En gjaldeyrismál munu vega þungt í huga margra kjósenda þegar gengið verður til atkvæða þann 18. september næstkomandi.