Ekki rétt að ég hafi komið meiddur til Íslands

„Enginn vill spila fótbolta meira en ég,“ segir Chukwudi Chijindu, betur þekktur sem Chuck, framherji Þórs frá Akureyri í Pepsi-deild karla í knattspyrnu. Chuck hefur ekki enn komið við sögu í fyrstu fjórum umferðum deildarinnar og Þórsarar sakna hans mikið.

Norðanmenn eru án stiga sem endurspeglar gengi þeirra í fyrra þegar Chuck spilaði ekki. Þeir fengu 22 af 24 stigum sínum á síðasta tímabili með hann í liðinu. Hann skoraði 10 mörk í 18 leikjum og átti stóran þátt í því að Þór hélt sæti sínu í deildinni.

„Ég meiddist á kálfa á æfingu fyrir fyrsta leik. Ég er bara í endurhæfingu núna og get hjólað og gert þrekæfingar en ég er ekki byrjaður að æfa. Meiðslin leyfa mér það ekki,“ segir Chuck í samtali við Fréttablaðið en hann var einmitt nýkominn úr ræktinni þegar blaðamaður tók hann tali.

„Ég vona að ég geti spilað aftur eftir eina til tvær vikur en það er bara ég að vona það besta. Þetta er í fyrsta skipti sem ég hef verið svona lengi frá síðan ég kom til Íslands og eðlilega er þetta mjög erfitt fyrir mig, félagið og stuðningsmennina. En meiðsli eru samt bara hluti af leiknum. Ég get alveg sagt þér að það er ekkert gaman að sitja uppi í stúku og horfa á leikina,“ segir Chuck.

Var klár gegn Keflavík

Eftir fjórða tap Þórsara í röð var mikilvægi Chucks rætt í Pepsi-mörkunum og var þar velt upp hvort félög þyrftu að standa betur að læknisskoðun þegar verið væri að fá menn erlendis frá.

Chuck sá ekki þáttinn en var sagt frá umræðunni og skrifaði þá þrjár færslur á Twitter-síðu sína þar sem hann fór í kringum hlutina. „Sannleikurinn mun koma í ljós,“ sagði í einni og „Þessir menn fá borgað fyrir að tala,“ sagði í annarri. En hvað átti hann við?

„Ísland er lítið land þannig að skilaboð um þetta rötuðu til mín. Það er mikilvægt að menn passi hvað þeir segja því fullt af fólki trúir því sem það heyrir án þess að fá staðreyndir. Það er ekki satt að segja að ég hafi komið til Íslands meiddur og sé að kosta félagið fullt af peningum. Ef þeir hefðu skoðað málið hefðu þeir vitað að ég var að æfa á fullu og spilaði æfingaleik á móti Magna rétt fyrir mót. Ég var klár í fyrsta leikinn gegn Keflavík og hefði spilað hann ef ég hefði ekki verið í banni. Menn verða bara aðeins að hugsa áður en þeir tala og hafa staðreyndirnar réttar,“ segir Chuck, sem segir þetta þó ekkert á sig fá.

„Ég tapa ekkert svefni yfir þessu. Ég veit bara að það er fullt af fólki sem horfir á þáttinn og margir taka öllu því sem þeir heyra sem sannleika. Það er bara mikilvægt að það komi fram að ég kom ekki meiddur til landsins heldur var ég í góðu formi.“

Snýst ekki bara um peninga

Framherjinn viðurkennir fúslega að hann hafi verið í viðræðum við stærri félög á höfuðborgarsvæðinu.

„Það er ekkert launungarmál en það truflar mig ekkert að spila fyrir Þór,“ segir Chuck, sem var eðlilega eftirsóttur eftir síðasta tímabil. Samningaviðræður við stærri félögin gengu þó ekki sem skyldi.

„Ef þú átt að heita stórt félag þarftu að hegða þér þannig. Mér fannst vanta aðeins meiri hugsun á bak við tilboðin í borginni. Þetta væri öðruvísi ef ég væri 18 eða 19 ára strákur að gera minn fyrsta samning en ég er búinn að spila í hálft sjöunda ár sem atvinnumaður. Það er eitt að ræða við strák og svo reyndan atvinnumann,“ segir Chuck og heldur áfram:

„Ég átti samt góðar samræður við alla en ég get ekki skrifað undir samning sjálfur. Það þarf tvo til. Um tíma gengu samningaviðræður vel en á endanum gekk þetta ekki upp. Þetta snýst ekki bara um peninga en á endanum gerði ég það sem ég taldi best fyrir mig. Ég var líka með tilboð frá öðrum löndum en ég valdi Þór og tel það hafa verið rétt í stöðunni.“

Vinnur að næsta skrefi

Chuck er frá Kaliforníu í Bandaríkjunum og á að baki leiki í MLS-deildinni þar í landi. Hann segist hafa fengið tilboð frá félögum í stærri deildum áður en hann kom til Þórs í fyrra og aftur núna en kaus að fara til Akureyrar.

„Mér gekk vel á síðasta ári og áður en ég fór Íslands höfðu félög frá Norðurlöndunum samband og einnig Asíu. Markmiðið er alltaf að taka næsta skref en hafi ég lært eitthvað á fótboltaferlinum þá er það það að ekkert er öruggt. Ég vinn að því að taka næsta skref en fyrst þarf ég að ná mér af meiðslunum og hjálpa Þór. Ef ég spila vel fyrir Þór þá sér allt hitt um sig sjálft,“ segir Chukwudi Chijindu, eða Chuck.