Forseti tekur próf við eigin deild

Teitur Jónsson, forseti tannlæknadeildar Háskóla Íslands, mun í dag verja doktorsritgerð sína við deildina. Þetta er að öllum líkindum í fyrsta sinn í sögu skólans sem forseti tekur próf við sína eigin deild.

„Þetta er í sjálfu sér ekki mjög óvænt,“ segir Teitur. Hann bendir á að sífellt fleiri kennarar stundi nám að einhverju leyti samhliða starfi sínu. „Meira að segja var varaforseti deildarinnar að verða doktor í síðasta mánuði,“ segir Teitur en Bjarni Elvar Pjetursson varði ritgerð sína í mars.

Teitur á von á því að sjá marga nemendur sína við doktorsvörnina en vikulegur fyrirlestur Tannlækningastofnunar Háskólans verður felldur niður í dag og tannlæknanemar á fjórða til sjötta ári skyldaðir að mæta á vörnina í staðinn. Hann segist hæfilega taugaóstyrkur við tilhugsunina um að sitja próf fyrir framan nemendur sína.

„Jú, ég var ekki búinn að hugsa um það mikið þar til nýlega,“ segir Teitur. Hann á þó ekki von á öðru en að standa sig með prýði.

„Maður er ekki fæddur í gær,“ segir hann. „Svo er búið að samþykkja þetta pródúkt á ýmsum stöðum, þannig að þetta er í raun bara uppskerudagur.“