Ekki geðþóttaákvörðun ráðuneytisins

Jóhannes Þór Skúlason, aðstoðarmaður forsætisráðherra, segir að ummæli Sveins Arasonar, ríkisendurskoðanda, í Fréttablaðinu í gær um að jafnfræðis þurfi að gæta við úthlutanir á vegum stofnana ríkisins eða ráðuneyta, hafi verið almenns eðlis. Þau eigi ekki við umfram sambærileg verkefni á vegum ráðuneytanna.

Um er að ræða úthlutun ráðuneytisins til verkefna sem lúta að húsfriðun, græna hagkerfinu og varðveislu menningarminja.

„Meirihlutinn af þessum pening, 175 milljónir af þessum 205, voru undir fjárlagalið frá síðasta kjörtímabili sem var úthlutað til ráðherranefndar um atvinnumál. Þetta eru peningar sem lágu eftir síðasta kjörtímabil og þeim hefur alltaf verið úthlutað á þennan hátt,“ segir Jóhannes Þór.

Í tilkynningu frá forsætisráðuneytinu segir að peningarnir hafi ekki komið úr sjóði og hafi því ekki verið auglýstir. Peningarnir séu millifærðar fjárheimildir af fjárlagaliðum ráðuneytisins til Minjastofnunar Íslands.

Að sögn Jóhannesar eru í öllum ráðuneytum fjárlagaliðir sem lúti samskonar lögmálum sem úthlutað sé úr án þess að sérstaklega sé auglýst eftir umsóknum eða fagnefndir séu skipaðar vegna úthlutana. Meirihluti verkefnanna hafi fengið styrki eftir ábendingar frá Minjastofnun, Þjóðminjasafni Íslands og formanni húsafriðunarnefndar og vísar hann því á bug að úthlutun tæplega helmings verkefnanna í kjördæmi forsætisráðherra hafi verið geðþóttaákvörðun ráðuneytisins.

Aðspurður segir Sveinn Arason að Ríkisendurskoðun hafi gert athugasemdir við fjárlagaliði hjá ráðuneytum og að ummæli hans í Fréttablaðinu eigi því við um úthlutun forsætisráðuneytisins. Allir eigi að geta sótt um fjármuni til verkefna þegar verið sé að ráðstafa ríkisfé.