Leitin engan árangur borið

Víðtæk leit að Arkadiusz Pawel Maciag, liðlega fertugum pólskum karlmanni, sem hófst á Reykjanesi upp úr miðnætti, hefur enn engan árangur borið. Síðast náðist símasamband við hann um klukkan þrjú í nótt og var hann þá orðinn blautur og kaldur.

Maðurinn er í heimsókn hjá vinafólki hér á landi og þegar því fór að lengja eftir honum í gærkvöldi fór að svipast um eftir  honum,  en þar sem það bar ekki árangur hófst formleg leit upp úr miðnætti.

Hátt í hundrað björgunarsveitarmenn tóku þátt í henni í nótt og fjölgar enn. Þyrla Landhelgisgæslunnar var send á svæðið í nótt til að miða út farsíma mannsins, sem leiddi til þess að leitarsvæðið var þrengt. Það er nú austur af flugvallarsvæðinu og í grennd við Sandgerði og Garð.

Af og til náðist símasamband við hann,  en hann gat ekki gefið greinargóða lýsingu á staðháttum. Í ráði er að þyrla hefji aftur leit nú í hádeginu. Maðurinn er dökkhærður og dökklæddur og biður lögreglan á Suðurnesjum alla þá sem kunna að hafa orðið varir við hann að láta sig vita í síma 420-1800.